ВатIаналъул кIудияб рагъ
КIудияб доб рагъде, эбелаб ВатIан,
ТIолалго рахъана улка цIунизе.
ХIинкъи-къай лъалареб, къвакIараб гIалам,
Цо гIадин рахъана ахIи тIад щведал.
Бидулаб рагъги бан Гитлерил бояз,
Ракълилаб доб гIумру щущазабуна.
ТIолабго Европа кверзукье бачун,
Жив пача вугилан лъазе гьабуна.
Гьелдаги чIечIого хъантIараб хъумур,
Тохлъукье ракълилаб къотIи хвезабун,
Рейхалъул рищарал дивизиябаз,
ГIорхъи хвезабуна СССРалъул.
Гьез чIварал, рухIарал, хIисаб букIинчIо,
Цебе ккарабщинаб цIадуеги кьун.
Кверде рачIаразул, концлагеразул,
Газалъул печазул, крематоразул.
Москваялде немцал гIагарде щведал,
Сталиница кьола кьварараб буюрухъ.
Цо гали нахъехун къазе гьечIилан,
Гьаб нилъер ракьалъул, кьеларо бутIа.
ЩугогIан соналъул гIассияб рагъда,
Рагъазулъ рагIичIел камиял ккана.
Къого миллионгун жегиги цIикIкIун,
ВатIаналъе гIоло кьуна жидер рухI.
Рейхстагалда байрахъ парпадизабун,
ТIолабго Европа эркен гьабуна.
ГIемер памятникал рукIана рарал,
РукIана гIезегIан хъварал одаби.
ГIасраби хисула, сонал сверула,
Сверула бутIрулги политиказул.
Жакъаги нацистаз, миллитаристаз,
Ракълилаб къо гьечIо ракьалда толеб.
Кинан кIоченел дол ихдалил къоял,
Польша, Украиналъ гьабураб дандчIвай.
Гьебго хIалалъ чехал, югославалгун,
Цадахъ рохиялъул гIорхъи букIинчIо.
КIочана согIазе гьабураб лъикIлъи,
Жакъаги гьале дол Украиналда.
Бандеразул къокъа, гьезул хутIелал,
Къисас босичIого теларинги чIун.
