Унтаразе пайдаяб
Брокколи
«ХъапустIаналъул ханилан» жанда абулеб гьеб нигIмат Европаялде бачӀана XVI гӀасруялда. Брокколи буго сахлъиялъе пайдаябги. Гьелъулъ руго селен, кремний, железо, кальций, бор, йод ва гIемерал цогидалги пайдаял витаминал.
Эркенал радикалал, токсинал, шлакал ва басралъарал клеткаби нахъе инариялъе кумек гьабула гьелъ. Хасго гьеб лъикӀаблъун бихьула экологиялъул рахъалъ санагӀат гьечӀел бакӀазда гӀумру гьабулел гӀадамазе. Брокколи кванилъ хIалтIизабулел чагӀазул тIом букIуна цIвакараб ва берцинаб.
Лъимер гьабизе ругел руччабазеги пайдаяб буго брокколи. Гьелда жаниб бугеб фолиевая кислотаялъ гӀахьаллъи гьабула лъимер берцинго гӀуцӀиялъулъ ва гIеялъулъ.
Брокколиялъул пайда буго чакрил унтиялъ унтаразеги.
Гьеб овощ кваназе лъикIаб буго нервабазул унтаби ругезеги. Гьелъ лъикӀаб асар гьабула беразул канлъи лъикIлъиялъе.
Гьелъулъ цӀикӀкӀун буго бета-каротин, гӀолохъанлъиялъул ва берцинлъиялъул витамин. Бищунго хӀажатаб аминокислотаялъ ва хлорофилалъ гӀахьаллъи гьабула би гӀуцӀиялъулъ.
Рехсараб овощалъулъ букӀуна белок, гьеб къиматаблъун ккола изолейцин ва лизин цӀикӀкӀиналъ. Гьелъул цоги тӀокӀлъи - холестерин лъугьине биччалареб метионин ва холин жинда жаниб букӀин. Гьединлъидал гьеб нигIмат кваназе лъикӀаб буго ракӀалъул ва лугбузул унтаби ругел гIадамазе. Гьеб кванаялъ гӀемерго дагь гьабула инсульт ва инфаркт ккеялъул хӀинкъи.
