КIочене бегьуларо
21-абилеб гIасру. Дунял-гIаламго мехтараб, рахIат гIемерлъараб, гIаданлъиялъул къимат гьечIеб…
Кин гIумру гьабилеб гьаб гIасруялда? Кин гIезарилел ясал? Жакъа ясал - метер улбул, кин нуж гIолел ругел гьаб гIасруялда? Умумуз куцахъейищ? Сундулъ бугеб нужее лъикIлъи? Жакъа хIинкъизе бачIуна гIолеб гIелалда. Кин гьез гIумру гьабизе бугеб: я мацI гуро, я маданият гуро, я гIадат гуро гьезул. ГIицIго кодор телефоналги, хадур ралагьун ругел лъималги. Рокъоб квен гьабуларо, кинабго бичун босула.
Школазда рахьдал мацIалде кIвар кьоларо, рокъоб улбуз гьеб бицунаро. МагIарул мацI лъаларел магIарулал. ХIисаб гьабе, щиб гьез малъилеб, бицинеб метер жидерго лъималазда? МацI гьечIони, гьечIогури миллатги… Гьеб буго цояб рахъ, цогидаб рахъ буго рахIат гIемерлъи. Лъимал гIезарулел руго яслиязда. БитIун лъимералъе, хасго ясалъе къваригIараб мехалъ гьелъул лъимерлъи унеб буго чияр гIаданалда аскIоб. «Эбел хисуларо лъицаниги, эбелалъ хисула киналго» - ян гIадада гурелъул умумузул аби бугеб. Дир лъимал гIуна гьедин, хIалтIуде дунги хьвадун, кIодоэбелалда аскIор. Дие бокьилаан заман нахъбуссинабизе: гьезда аскIой йикIине. Дир руго васал, амма нижер хъизамалда йикIана ункъо яс.
Щаяли лъаларо, гьелда кидаго батулаан нижеда малъизе хIалтIи. Гьелъ хIалтIи гьабулагоги ниж кидаго аскIор рукIине кколаан. Нижер букIунароан гIодорчIун рукIине заман. Гьелъ ракIалде щвезарулаан ункъгIалалъул росасул рагIаби: «БакI хъирщунги чIезе тезе бегьуларин ясал», - ин абурал. ГьедигIанго кьварарайги йикIинчIо эбел, амма кIочонаро гьелъул рагIаби: «Ясал маркIачIул гIужалъ къватIире унаро», «Кидаго дуцаго гьабе кинабго: цо гьабуни лъугьинаро, кIиабилеб лъугьина, лъабабилеб тIубанго бажарила», Жакъа ругел гIолилал! Нужее гIадин рагьун кинабго кьун букIинчIо цониги заманалда: цIалиги, динги, рукIа-рахъинги. Амма гьарула нужеда кIочене тоге мацIги, гIадатги, гIамалги. Лъица щиб бицаниги, нилъер умумуз нилъее кьураб тарбия кIочене бегьуларо.
УМИЯТ ДАВЛЕТМУРЗАЕВА ДГИЯЛЪУЛ МУГIАЛИМ
