«Квартирантазул» гIумру
«Квартирантазул» гIумру
ХIурматияб диналъул агьлу, гьаб дунялалда нилъер хIалтIи цIакъго дагьаб буго. Нилъер мисал буго гьоболлъухъ цо бакIалдаги рещтIун чанго къо балел гIадамазул. КигIанасеб хьул букIинеселде гьабулеб гьедин гьоболлъухъ рещтIарав чияс? Бищунго цIикIкIани, гьесул план букIина гьоболлъухъ вугебгIан заманалъе жиндиего ресалда ва бакIалда рекъараб сурсатгун рахIат гьаби.
Гьоболлъухъ рещтIарав чияс, гьеб бакIалда чIаравго чиясул гIадаб яшав гьабизе лъугьани, масала, гьениб мина базе, боцIи-панз букIинабизе, нахърател бакIаризе, гьесда гIабдалин яги ахIмакъин гурони абиларо. Щайгурелъул гьев вуго гьобол, гьеб бакI хехго тезе кколев чи. Гьединаб хIалги букIаго, гьебгощинаб жо бакIари гIададисеб, гьенибго тезе кколеб жо бугелъул.
Нилъерги гьебго мисал буго. Гьаб дунялалда гьоболъухъ руго нилъ. Гьанир ругебгIан заманалъе гуреб, гьелдаса цIикIкIараб магIишат данде гьаби гIададисеб букIиналде тIаде кIалгьикъигун гIакъубаялъе бугелъул. Гьединги букIаго, щибго бицунелъухъ гIинги тIамичIого, берда цебе бугеб жоги халлъичIого рукIиналдаги ахIмакълъиян гурони абизе тIокIаб цIар батулеб гьечIо.
ВагIза-насихIатазда нилъеда рагIула гьаб дунял хехго тезе кколеб, гьабураб магIишаталъул ххамил кIиго кесек гуреб тIокIаб жо цадахъ босулареб бакI букIин. Гьебги нилъее якъинлъула щибаб къойил гIадин дунял тун унел гIага-божарал рихьиялъ. Умумузул цониги чIаго хутIарав чи гьечIогури. Гьезул лъие бокьун букIараб гьаб рахIатаб дунял тезе? Гьедин мухIканго лъалебги букIаго, согIго рукIиналъе цоги жаваб гьечIо, иман загIиплъи гурони.
Балагье, нилъер шагьаразда ругел цо-цо гIадамал рукIуна рукъги ижараялъе ккун гIумру гьабулел. Гьезда тIадаб жолъун ккола щибаб моцIрое ижараялъухъ гIарац гьеб рукъалъул хважаинасухъе ккезаби. Гьеб гуреб цогидабщинаб гьеб рукъалда тIад гьабулеб хIалтIи ккола гIададисеб. Щайгурелъул бокьараб къоялъ гьелъул бетIергьанас къватIире рахъинаризе рес буго. Цинги гьениб гьабунщинаб хIалтIиги гIадада ккола, гьелде тIадеги, бадибчIвайги щвезе бегьула, баркалаяли кисан гурин.
Ккураб рокъоб гIумру гьабурал гIадамазде гIага-божараз кутакалда гIайиб-гъвел гьабула. Гьаб щиб яшавин, щайин нужеего рукъалъе санагIат гьабуларебин, кидаго чияе гIарац кьолелищин рукIинел абун. Дунялалъул къануназда балагьани, гьеб пикру битIараб буго. Амма ахираталъул пикру гьабуни, гьедин рукIин дагьабгицин лъикIаб буго. Щайгурелъул, гьев чиясда киданиги кIочене рес гьечIо жив чияр рокъов гIумру гьабун вукIин. Жеги, гьев чи кидаго хIадурав вукIуна бокьараб мехалда гьениса къватIиве вахъине. Гьелеха исламалъ инсанасдаса тIалаб гьабулеб жоги.
