Аварагасул ﷺ бусен
Дунял пайда гьечIеб жо букIин Бичасул аварагас ﷺ жиндирго мисалалдалъун бихьизабуна нилъеда. Гьеб рагIи ритIухъ гьабула хириясул ﷺ кинаб бусендай букIараб къаси гьев вегулеб ва кин хIухьбахъи гьабулебали цIех-рех гьабуни.
Бичасул аварагасул ﷺ хъизаналда, жинда Аллагь разилъаяй ГIаишатида, цIехон буго кинабин букIараб дур рокъоб аварагасул ﷺ бусенилан абун. Гьелъ жаваб гьабун буго, жаниб чамасдакил тIамах бугIараб тIомол бусен букIанин.
КигIанасеб гьеб букIарабали лъани, нечечIогоги кинха нилъ рукIинел? Хирияв МухIаммад ﷺ аварагасул бусадул халалъи букIана кIиго натI, ай гIага-шагарго цо метр ва гIеблъи букIана цо натIгун тIаде цо рокьобги, ай 70 см.
Гьелде тIадеги авараг ﷺ кьижулаан гIицIго туруталда тIад. ГIабдуллагь ибну МасгIуд абурав асхIабас бицун буго, гьитIинабго рокъов вукIарав аварагасде ﷺ тIаде щванила жив. Гьев ватанила туруталда тIадги кьижун, гьесул хьибилалда бугоанила гьелъул гIуж, сипат-сурат къаркъалаялда тIад гьабураб. Цинги жив гIоданила. Бичасул аварагас ﷺ гьикъанила щай мун гIодулев вугевилан абун. Жинцаги абунила, Кисрагун Къайсар ругин тамахал, дарайдул бусабазда, мунин абуни гьаб туруталда тIад кьижун вугин, жеги дур хьалбазда гьелъул асаргицин бугин. Мун гIодугейин абунила Бичасул аварагас ﷺ, гьезие дунял, нилъее ахират бугин.
Балагьеха, нилъеца босулеб рахIаталъухъги, хирияв аварагасул ﷺ гIумруялъухъги. Тамахлъи гIоларого, хIеренлъи дагьаб бихьун рукIуна нилъ. ХIакъикъаталдайин абуни гьаб дунял цIакъ къокъаб, пайда гьечIеб жо букIин жиндирго гIумруялъул мисалалдалъун бихьизабун буго Бичасул аварагас ﷺ. ХIатта ансариязул цо чIужугIаданалда гьесул къвакIараб бусенги бихьун, рокъоса босун щвезабун буго тамахаб квасул бусен. ГIаишат гьеб нахъе кьезе йитIун йиго, гьелда вегиялдаса инкарги гьабун.
«ИхIяалда» имам Гъазалияс хъван буго, лъимал гьоркьо-гьоркьоб къвакIараб бакIалда регизареян, кидаго тамахаб бакIалде ругьунлъичIого рукIине. Нилъер гьабулеб гьеб киналъулго гIаксалда буго. Дагьабниги къвакIараб яги гьогьомараб бакIалда лъимал яги нилъго регани, хвезе ратилин ккола ракIалде. Амма ахир руссунеб хабал донкIиниб бусенлъун дунялалда нилъеца гьабураб гIамал гурони батизе гьечIо. Гьединлъидал дунялалъул дагьаб заманалъул бусаби тамах гьарулел рукIинчIого, ахираталъул тахал щвезе рес бугеб гIибадат гьабизе лъикIаб ва тIадаб буго.
