Иманалъул хIасил
Иманалъул хIасил
Цо нухалъ ГIумар-асхIаб къасимехалъ къватIиве вахъуна Аслам абурав чигун. ГIадамазул ахIвал-хIал киндай бугебали балагьулеб заманалда, ГIумарида рагIула къадада нахъасан эбелалъулги ясалъулги хабар.
Жиндир вилаяталда ГIумар-асхIабас гьукъун букIана рахьдалъе лъим жубазабизе. Эбелалъ ясалда абула рахьдалъе лъим тIейин абун, ай базаралда бичизе букIине. Ясалъ эбелалда абула, дуда лъаларищин халифас гьеб иш гьукъун бугеблъи. Эбелалъ абула гьесда бихьулебищ бугебилан абун. Ясалъ жаваб гьабула ГIумар-асхIабасда лъачIониги гьесул БетIергьан АллагьасдагIаги лъалелъулилан абун.
ГIумар-асхIабасе цIакъ рекIее гIола ясалъул жаваб ва аскIов вукIарасда абула гьаб мина бугеб бакI ракIалда чIезабеян. Нахъисеб къоялъ ГIумарица гьесда абула дол чагIазул хIакъикъат лъазабейин ва дой ясалъул рос вугищали цIехеян.
Асламица цIех-рех гьабула ва ГIумар-асхIабида бицуна яс Бану Гьилал къапилаялдаса кколин, гьей росасдаги гьечIин абун. Цинги ГIумар-асхIабас жиндирго васал ахIула ва гьезда абула нужее кинасейин бокьилеб лъикIай гIадан лъадилъун ячинейилан абун. ГIабдуллагьицаги ГIабдурахIманицаги абула жидер лъудби ругин ва ГIасимица абула жиндие ячейин абун. ГIасимица гьей ячуна, цинги гьезие гьарула МухIаммад ва Лейла абун цIарал лъурал лъимал. Хадуб Лейла ячуна ГIабдулгIазиз ибн Марваница, цинги гьезие гьавула дунялалдаго машгьурав халифлъун вахъарав ГIумар ибну ГIабдулгIазиз. Балагье ясалъул диналъул бугеб мухIканлъи.
Цо нухалъ Сагьлу ибну ГIабдуллагьида гьикъула бацIцIадаб, хIалалаб жо щиб кколебилан абун. Гьес абула, хIалалаб жо кколин ТIадегIанав Аллагьасе ﷻ гIасилъи жиндилъ гьечIеб. Амма бацIцIадаб, хIалалаб жо кколин жиндилъ Аллагь ﷻ кIочон толареб жоян.
