Аварагасул ﷺ цIарал
Аварагасул ﷺ цIарал
Аварагасул ﷺ цIарал ругониги, тIокIцIар, сипатал ратаниги, гьезул къадар, цо-цо гIалимзабаз рикIкIарал ва гIурхъи гьабурал руго кIинусиде гIагарун. Жалалудин ас-СуютIияс жиндирго тIехьалда данде гьарурал гьел щунусгогIанасел руго. Амма суфизабаз абула гьел азаргоялде гIагаралцин ругин абун.
Аварагасул ﷺ цIараздасан буго «ал-Хатиму» абурабги. Гьелъул магIна ккола «ЛъугIизабурав» абураб. БетIергьанас ﷻ гьесдалъун лъугIизаруна аварагзаби ритIи, ай гьесдаса хадув тIокIав авараг вахъинчIо ва вахъинеги гьечIо.
Буго «аз-Загьиру» абурабги цIар. Гьелъул магIна ккола «Загьирав, загьирлъарав» абураб. Гьев ﷺ загьирлъана киналниги загьирал жалазда тIад, гьесул динги загьирлъана цоги диназда тIад.
Гьесул ﷺ буго «ал-БатIину» абурабги цIар. МагIнаги буго «БатIиналде, балъголъабазде ваккулев» абураб. БетIергьанас ﷻ вахIю гьабиялдалъун авараг ﷺ ваккулаан балъгоял амрабазде.
«Ар-Рауфу ррахIим» абураб цIарги буго аварагасул ﷺ. Къуръаналда бицен гьабун БетIергьанас ﷻ тараб цIар буго гьеб аварагасда ﷺ. Гьелъул магIна ккола «Жив мутIигIазда, мунагьал гьарулезда цIакъ гурхIулев» абураб.
Буго «ал-ХIакъкъу» абураб цIарги. Гьелъул магIна ккола «Унго-унгояв, хIакъав» абураб. «Ал-Мубину» абураб цIаралъул магIна ккола «Аллагьасул ﷻ рахъалъан бачIараб жинца баян гьабулев, жиндир амруги рисалатги баян гьабулев» абураб.
«Ал-Жаббару» цIаралъул магIна ккола «ХIал гьабун халкъ хIакъалде тIобитIарав ва купруялдаса гьеб нахъчIварав» абураб. Къази ГIиязица абун буго БетIергьанас ﷻ аварагасдаса ﷺ чIухIиялдалъун хIал гьабулевлъун вукIин абураб жо нахъчIванин.
Аварагасул ﷺ цIараздасан буго «ал-Музамил» абураб. Гьелъул магIна ккола «Жиндир вегулеб ратIлилъ вегун чIарав» абураб.
«Ал-Мудасир», гьабги буго цебеселъулалдаго гIадаб магIна релълъараб, «РетIелги тIаде рехун, ратIлилъ вахчарав» абураб. Гьединал цIарал аварагасда ﷺ БетIергьанас ﷻ тана ХIираъ нохъода вахIю рещтIун, ЖабрагIил малаикги жиндирго ﷺ сураталда вихьизавун хадуб, авараг ﷺ хIинкъун, черхалда сири бан рокъове щведал, Хадижатида вахчизавеянги абун гьев ﷺ вахчараб мехалъ.
Жеги буго «Накъиб» абурабги. Гьелъул магIна ккола «Къавмалъул хъаравул, нугI, гьезие гъоркь чIарав» абураб.
«ГIазим» абурабги буго. МагIна - «Къадру кIудияв».
