Аслияб гьумералде

Аллагьасда лъала

Аллагьасда лъала

Аллагьасда лъала

Инсанасул щибаб калам, пиша букIуна ТIадегIанав Аллагьасул ﷻ балагьиялда гъоркь. Къиямасеб къоялъ щивав чияс гьабураб лъикIаб ва квешаб гIамалалъухъ жаваб кьезеги ккола. Бищун лъикIалги ккола, гьарурал мунагьаздаса тавбу гьабун, Аллагьасде ﷻ руссарал.

 

Цо къоялъ Аварагасухъе ﷺ вачIуна гIалхул гIарабияв ва гьикъула: «Я Бичасул Расул ﷺ, дица мунагь гьабуна ва гьелда хадуб тавбуги гьабуна, ракIги бухIана. Аллагьас ﷻ дир тавбу къабул гьабулищ?» - илан. Гьесие Аварагас ﷺ Къуръаналъул аяталдалъун жаваб гьабуна (магIна): «ТIадегIанав Аллагь ﷻ вуго лагъзадерил тавбу къабулев гьабулев. Жинца ﷻ гьезул квешал гIамалал тIаса лъугьун толев. Аллагьасда ﷻ лъала нужеца гьабулеб гIамал». (Сура «Аш-Шура», аят 25)

Гьеб жаваб рагIидал гIарабияв вохун къватIиве ана. Цинги цIидасанги вачIана ва гьикъана: «Я Аллагьасул ﷻ Расул, дица махIцараб пиша гьабулаго ТIадегIанав Аллагьасда ﷻ бихьулеб букIанищ?» - илан. Аварагас ﷺ абуна бихьулеб букIанин ва цIалана Къуръаналъул аят (магIна): «ТIадегIанав Аллагьасда ﷻ лъала нужер бералъ гьабураб хиянатги. Нужер ракIазда жаниб бахчун бугеб балъголъиги лъала Аллагьасда ﷻ», - ян. (Сура «Гъафир»)

Гьеб аят рагIидал гIарабиясул гьаракь кIанцана ва гьес абуна: «Гьес ﷻ дир тавбуги къабул гьабула ва гьебгун цадахъ Гьесда кинабгоги ﷻ бихьула. Кин дида гьанже кIвезе бугеб Гьесухъ валагьизе», - ян.

Гьел рагIаби абун рахъиндал, гIалхул гIарабияв хола. (ИхIяъ)

Абу МухIаммад Тустарияс, живго гьитIинаб мехалда букIарабги ракIалде щвезабун, хъван буго: «Дир букIана лъабго сон. Цо-цо мехалъ дие бокьулаан рогьинегIан кьижичIого гIибадат гьабулев вугев имгIаласухъ валагьизе. Цо къоялъ гьес дида гьикъана: «Дуда дурго БетIергьан вичIчIулищ?» - илан. Цинги дица гьикъана: «Кин дида гьев вичIчIизе кколев?» - илан.

«Кьижизе вегулаго дуца лъабцIул такрар гьаре гьал рагIаби: Аллагь ﷻ дунгун вуго, Аллагьасда ﷻ дун вихьула, Аллагьасда ﷻ дир хIал лъала», - ян абуна гьес.

Гьеб къоялдаса нахъе дица гьел рагIаби такрар гьаруна ва гьелъул хIасилги халлъана. Жеги цо лъагIалидасан имгIалас абуна: «ХвезегIан дуца гьел рагIаби абичIого тоге. Дунял-ахираталда кIудияб пайда гьабила гьелъ дуе», - ян.

Чанго лъагIалидасан вихьидалги гьес абуна: «Аллагь ﷻ жинда цадахъ вугев, Аллагьасда ﷻ жив вихьулев ва Аллагьасда ﷻ жиндир хIал лъалев лагъ мутIигIавлъун кин вукIунарев?» - илан.

 

 

Жабир Мажидов

2026-09-15 (РабигIул ахир 1448 с.) №18.


Сапаралда кинав вукIарав Авараг ﷺ?

Сапар буго инсанасул гIумруялъул цо бутIа. Муъминзабазе гьеб ккола Аварагасдаса ﷺ мисал босун ТIадегIанав БетIергьанасде ﷻ гIагарлъизе рес щвейги. Нилъер Аварагас ﷺ нухда кинаб хьвада-чIвади букIине кколебали малъа-хъваял гьари гуребги, жиндирго мисалалдалъунги бихьизабуна сапаралда ругелъул...


ГIажаибаб мугIжизат

Къуръан ккола жибго бищун кIудияб мугIжизат. Ва щибаб нухалъ гьеб лъазабидал гIажаиблъизеги гьарула. Гьелда жаниб географиялъулги хIикматал руго.   Аллагьас ﷻ Къуръаналда абуна: وَهُوَ الَّذِي خَلَقَ اللَّيْلَ وَالنَّهَارَ وَالشَّمْسَ وَالْقَمَرَ كُلٌّ فِي فَلَكٍ يَسْبَحُون   МагIна:...


Нужее баяналъе

Авараг гьавураб сон щиб сон букIараб? – Пилалъул сон. Пилалъул сон абун щай гьелда цIар тараб? – Гьеб соналъ Абрагьат аскаргун ва пилалги рачун КагIба биххизе вачIун вукIана. Аварагасе ﷺ кьураб бищун кIудияб мугIжизат щиб букIараб? – Къуръан. Муса аварагасул...


Муфти дандчIвана Сулеймангун

Дагъистаналъул муфти, шайих АхӀмад-афандица, ГӀиса аварагасул цIаралда бугеб централда къабул гьавуна Гъарабудахкент районалъул Параул росулъа гӀараб каллиграфиялъул устар Аширлаев Сулейман. Гьес сайгъат гьабуна хирияб Къуръаналъул жинцаго квералъ хъвараб, цогидаздаса батӀияб нусха. ГӀага-шагарго...


Египеталде сапар

Египеталде сапаралъ араб Дагъистаналдаса делегация дандчӀвана Вакъфазул рахъалъ министр Усама ал-Азгьаригун. Дагъистаналъул делегациялда гъорлъ рукӀана: ДРялъул диниял суалазул ва миллияб политикаялъул министрасул заместитель ТӀагьир Сутаев, министрасул кумекчи ГӀабдулбасир Абакаров, ДРялъул...