Дагъистанго данделъараб мажлис

Араб шамат къоялъ, ай щуабилеб июлалда Дагъистаналъул муфтияталъул нухмалъиялда гъоркь, Шамил районалъул Гьолокь росулъ тIобитIана республикаялъулго гIелмияб мажлис. Гьенире рачIун рукIарал гIалимзабазул цIарал рехсани, сияхI цIакъго халалъила. Абизе бегьула гьеб мажлисалда камурав цониги гIалим вукIун ватиларин абун. Дагъистан буго гIалимзабазул гIелмуялъги машаихзабазул баракаталъги ккураб ракь.

Мажлис гьабулеб бакIги бугоан цIакъго кIудияб гIатIилъи бугеб. Гьеб бакIалда советазул заманалда букIана аэродром. ЦIакъ берцинаб, беричаб тIабигIат бугеб бакIги буго гьеб. АскIосан чвахулеб Авар гIор, хергIуччинаб майдан.

Гьениб цеве вахъанщинав гIалимас гьабуна магIна гъваридаб вагIза. Киналго ахIана ахирзаманалъул питнабазде гъорлъе лъугьинчIого, вацлъигун гьудуллъи цIунун рукIиналде. Цолъи цIунизе кканиги чара гьечIого хIажат букIунин бицана нилъер цеве вугев бусурбабазул имам, Дагъистаналъул гIалимзабазул советалъул бетIер, муфти, шайих АхIмад-афандиясда, муфтияталда нахърилълъин. Гьедин гьечIони, щивас жиндиего данде ккарав бетIерлъунги тун яшав гьабизе лъугьани, цолъиги тадбирги букIунаро. 

Аллагьас нилъее кьун вуго бищун камилав исламалъул нухмалъулев, устар АхIмад-афанди. Кьураб нигIматалъе шукруги гьабун, гьесда нахърилълъун рукIиналда жаниб гIемераб маслахIатгун баракатги буго. Бикь-бикьараб жамгIияталда киданиги баракат лъоларо. Сундулъниги гьезул цебетIей букIунаро. 

Дунялалъул тарихалда жаниб гIемераб лъугьа-бахъин ккана, амма цеве вугев хIакъикъияв, исламалъул бетIерасде данде рахъаразе талихI сундулъго кьун бихьичIо. ГьабсагIаталда АхIмад-афандиясулъ данделъун буго устралъигун исламалъул цевехъанлъун вукIин. Гьелдаса талихI бугеб жо дагъистаниязе цоги гьечIо. Амма гьеб талихI, такъсир бихьулезда бичIчIизабизе бигьаги букIунаро. Берзул канлъи сварасда берцинлъиялъул гьайбатлъи кигIан бицаниги бичIчIилищ?

Цоги, нилъеда лъазе кколеб жо буго кинаб бугониги хъулухъ берцинго тIубалеб гьечIин абураб дагIба гьелде хьул бугесул гурони баккулареблъи. Жинцаго тIалаб гьабураб жоялда цадахъ БетIергьанасул тавпикъ букIунаро. КигIан керен буханиги, гьединаздаса щибго баракат бахунаро, гьелъул гIаксалда, халкъ питнаялде тIами гуреб цогидаб хайир кколаро.

Гьаниб бицинчIого гIоларо къокъабго заманалда жаниб гьелъие хIадурлъи гьабурал, Шамил районалъул имамазабазул советалъул нухмалъулев Сиражудинов МухIаммадгIарипил бетIерлъиялда гъоркь, районалъул киналго росабаз, хасго имамзабаз гьабураб хIаракаталъулги. Гьакьадерил жамагIат, гьалбадерие хъулухъ гьабизелъун, бахъун чIун букIанин абуни, мекъиги ккеларо. Аллагь разилъаги киназдасаго. Аллагьас Дагъистан ракълида, цолъиялда таги.  Амин.

ГIабдуллагь МухIаммадов