Бечелъизе бокьун бугищ?
Бечелъизе бокьуларев чи цониги ватиларо. Бечелъи шаргIалъ гьукъараб жоги гуро, амма гьелъ гIемерисел гIадамал гуккулел рукIиналъ, чIухIи бачIинабулеб батиялъ, пахрулъи бижизабиялъ, ахираталдаса рикIкIалъизариялъ, закагIат-сахI бахъизе кIвахIаллъиялъ исламалъ гьеб какула.
Бичасул аварагас ﷺ чанги асхIабасда малъана ризкъи бигьалъиялъе сабабал. Гьединазул цояб ккола Сагьлу бину СагIидиясдасан бицараб хIадис: «Бичасул аварагасде ﷺ цо чи зигардана жиндир пакъирлъиялдалъун ва магIишаталъулъ бугеб къварилъиялдалъун. Бичасул аварагас ﷺ гьесда абуна, рокъове лъугьунелъул гьенив ватарав чиясе салам кьейин. Гьенив щивго чи ватичIони, дие кьейин салам (аварагасе ﷺ). Цинги суратул «Ихлас», ай Къулгьу цIалейин.
Жинда абухъе гьабунила гьев чияс. Аллагьас гьесие боцIи-малги гьарза гьабунила, хIатта мадугьалзабазецин щолебгIан къадаралда», - ян.
Балагьеха диналъул агьлу, захIматаб жо бугищ гьеб. Рокъове лъугьунелъул саламги кьун цо нухалда суратул «Ихлас» цIализе бугоха. ЦIакъго бигьаяб жо гьечIищ гьеб? Гьединлъидалин цIакъго кIвар гьабизе кколеб гьединал суннатазул.
Аллагьас ﷻ кумек гьабеги.
