Алжаналде вачунев
Гьалмагъзаби руго эбел-инсуда, вац-яцазда, гIага-божаразда хадур рачIунел чагIи. Гьелгун цадахъ нилъеца тIамула гIезегIан заман, бикьула ургъел ва хIажатаб къоялъ хIалаеги рахъуна. Диналда жанибги кIудияб бакI ккола гьалмагъиялъ. Щайин абуни гьалмагъзабазул хIакъалъулъ рицарал аварагасул гIемерал хIадисал руго.
Абу-Давудица бицараб хIадисалда буго:
«Чи жиндир гьалмагъасул диналда вуго, гьединлъидал нужеца хал гьабе лъилгун гьеб гьабулеб бугебали», - ян.
Цо нухалда авараг , пуланав асхIабгун цадахъ, гъутIби ругеб бакIалде лъугьанила. Гьениб сивакалъе хIалтIизабизе кIиго гIаркьел беканила. Гьезул цояб букIанила битIараб, цогидаб - гьетIараб. ГьетIараб жиндиегоги тун, аварагас битIараб гIаркьел асхIабасе кьунила.
Цинги асхIабас абунила: «Я, Аллагьасул расул , мун дидасаги цIикIун мустахIикъав вуго битIараб гIаркьел сивакалъе хIалтIизабизе», - ян. Гьесие жаваб гьабун аварагас абунила:
«Цонигияв гьечIо жинца цогидасдехун цо къоялъгIаги гьалмагълъи гьабун, Къиямасеб къоялъ гьелдаса цIехон гурони. ТIубазабунищ гьес гьалмагълъи гьабиялъулъ Аллагьасул хIакъ ялъуни гIадада хвезейищ гьев тарав абун кIалгьикъиги гьабун гурого», - ан.
Гьаб ахираб заманалда бугеб кинниги, гьалмагълъи гьабулебинги абун, гьезда цадахъ бата-батараб гьаби бегьуларо, рукIине ккола Аллагьасда цере рахъараб мехалъ ахираталда цоцазе хIалае ратулеллъун, лъикIаб гIамал ккурал ва гьелде цадахъ вугевги кантIизавулевлъун.
ХIалае рати абуралъул магIнаги ккола, Аллагь лъалел чагIаз абулеб: «Алжаналъул агьлуялъ жал гьенире лъугьун хадур, дунялалда лъикIаб гьабун жидеда цадахъ рукIарал гьалмагъзаби гьенир ратичIеб мехалъ, БетIергьанасда цIехола: «Я, нижер БетIергьан , дунялалда ругеб мехалъ цадахъ какалги ралел кIалалги кколел гьалмагълъи букIана нижер, амма гьанир гьел рихьулел гьечIо», - ян. Жаваб гьабун БетIергьанас абула: «Нуж жужахIалде а ва гьениса къватIиве ваче жиндир рекIелъ дагьабгIаги иман букIарав чи», - ян.
Гьалмагъзабазулги Аллагьасе цIикIкIун рокьулел руго дандияздехун гурхIел гIемерал ва рукIа-рахъиналъулъ хIеренал. Гьедин абулеб буго хIадисалдаги. ХIасанул Басрияс гьалмагъзабазул хIакъалъулъ абун буго: «Нужеца гIемерал муъминзабазулгун гьалмагълъи ккве, Къиямасеб къоялъ гьел руго нужее шапагIатчагIи», - ян.
ЛъикIав гьалмагъ вуго мискал ричулев чиясда релълъун. Дуца гьесухъа босулеб гьечIониги гьесда аскIов вугебгIан заманалъ дудаса мискалъул махI бахъинчIого букIунаро. Квешав абуни, къебедасда релълъун, ай гьесда аскIов вугеб мехалъ мун сундаго квалквадулев гьечIониги, кIкIудул махIгIаги дудаса бахъинчIого букIунаро. Аллагьас щивасе насиб гьареги дунялалдаги ахираталдаги хIажатаб мехалъ аскIор ратулел гьалмагъзаби.
Амин!
МУХIАММАДГIАРИФ КЪУРБАНОВ «АС-САЛАМАЛЪУЛ» МУХБИР
