Къуръан цӏалун лъугIи
Казбек районалъул Ленинаул росулъ тӏобитӏана мутагӏилзабаз Къуръан цӏалун лъугIиялда бан мажлис. Гьебги тӏобитӏана Ленинаул росдал №3 школалъул актовияб залалда. Данделъиялда гIахьаллъана 102 мутагӏил, жидеца Аллагьасул калам - хирияб Къуръан цӏалун лъугIарал, гьединго, гьалбал, лъималазул умумул.
Мажлис тӏобитӏиялъе нухмалъи гьабуна росдал имам Гӏабдулгӏазизов Ражабица. Мажлисалда гӏахьаллъана ва кӏалъана Казбек районалъул имамзабазул советалъул председатель Ахӏмадрасул Качалаев, росдал имам Гӏабдулгӏазизов Ражаб, Гиляр росдал имам Салисгереев Гӏусман, Калининаул росдал имам Гӏабдула Гӏабдулхӏакимов, районалъул лъай кьеялъул отделалъул нухмалъулев Батилмирзаев Мухӏамадхӏажи, росдал бегавул Гъайирсултан Эсенбиев, росдал харабазул советалъул председатель Асхӏаб Кудуев ва цогидалги.
Кӏалъаразе рахъараз бицана Къуръан цӏализе лъазабиялъул ва цӏалиялъул хиралъиялъул, хадубккунги гьелде кьезе кколеб кӏваралъул.
Умумул разиго хутӏана мутагӏилзабаз Хирияб калам лъазабиялдаса, баркала загьир гьабуна мугӏалимзабазе.
Мажлисалда ахӏана мавлид, умумуз гьаруна мугӏалимзабазе сайгъатал.
