Гьикъизе нечараб бицине намусаб
Гьикъизе нечараб бицине намусаб
Рекъелъ къан буго
Эбелалъ дие гуреб васасе, ай дир вацасе кумек гьабула сундулъго. Дие гьабулеб кумек букIунаро. Ноутбукги гьесие босана, цIалухъ гIарацги гьелъ кьола ва гьанже машина босизеги гIарац бакIарулей йиго. Эбел-эмен ратIалъидал дун инсуца цадахъ ячана, вац эбелалъухъ тана. Дун хIалтIулей ва дирго лъимадуе тарбия кьун дунго цохIо гIумру гьабун йиго. Инсуда цадахъ гIуниги эбелалъулгун гьоркьобги хвезе течIо. Эмен хвана ва гьесул рахъалдасан кумек гьабизелъун цониги чиги гьечIо. Эбелалъ дун цIехолейги гьечIо. Гьебги рекIелъ къан йиго дун. Дида бугеб гIайиб щиб?
Зайнаб, Каспийск
ГIалимчиясул жаваб
ЧIахIиял чагIазул, эбел-инсул адаб гьабиялде нилъ киналго диназ ахIула. Кинавниги чиясул гIумруялда жаниб бищун хирияв чиги эбел ккола. Лъималазда бищун гурхIулейги ва гьезул ургъел гьабулейги эбел йиго.
Эбел-инсуе баркала кьейги Аллагьасе щукру гьаби ккола. ТIадегIанав Аллагьас ﷻ Къуръаналда гьедин гьабейин абунги буго.
Эбел-инсудехун лъикI рукIин хурхинабун буго ТIадегIанав Аллагьасе гIибадат гьабиялда ва Гьев цо вукIин чIезабиялда. Лъимал кIудиял гIедалгицин эбел-инсул гурхIел ва ургъел гьаби цIикIкIун гурого дагьлъуларо.
ЦIикIкIарасеб заман инсуда аскIоб бан букIиналъ эбелалъул рахъалдасан тIубараб бербалагьи ва хинлъи дуе щун батичIонигицин гьанже эбелалдехун лъикI йикIине, гьелде гIагарлъизе хIаракат бахъизе ккола. Абизе кIола, якъинго гьелъиеги бокьун батула гьебго ва амма тIоцебесеб гали кин тIамилебали лъаларого ятизе рес буго. Эбелалъ мун рехон тей битIараб бугин абулел чагIи ниж гуро ва амма эбел-эмен кинал ругониги, хIатта капурал ругонигицин гьездехун лъикI рукIаян малъулеб буго нилъеда шаргIалъ. Дуца эбелалдехун цо гали тIамуни, гьелъ дудехун кIиго тIамула.
Дунялалъул боцIул гуреб, ахираталда щвезе бугелъул ургъел гьабизе ккола нилъеца. Эбелалъул ракI бохизабиялдалъун щола нилъее Алжан. Дунялалъул боцIи Аллагьас ﷻ нилъее хъварабго буго. Нилъее щвезе хъвараб щола, хъвачIеб щоларо. Эбел цIуне ва гьелъие дугIа гьабе.
Аллагьас ﷻ кумек гьабеги.
Психологасул жаваб
Киналго гIайибал дудего цIалел рукIиналъ гIумру гьабизе захIмалъизе буго дуе хадубккунги. Эбелалъул гьединаб гIамалалъе гIемерал гIиллаби ратизе рес буго, ай дур суалаздасан бичIчIизе рес гьечIел. ГIумруялъ цадахъ гIумру гьабулев вугев васасдехун ругьунлъун ятила гьей, яги инсудехун дур букIараб гьоркьоблъиялда бан батила, ялъуни гьелда ракIалда ккун батизе рес буго дур кинабго лъикI бугин абун.
Эбелалдехун квешаб бербалагьи гьабуни ва гьеб рекIелъ ккун йигони, дуего квеш букIина. Киналго къварилъабиги кIочене тун, кинай ятаниги эбел къабул гьае ва гьелъул гIамал лъикIлъилин абураб хьулалги жалго те. Амма эбел кинай ятаниги, гьелъ дуе ихтияр кьоларо гьелъие квешай йикIине.
