Гьикъизе нечараб бицине намусаб
Гьикъизе нечараб бицине намусаб
ЛъикIлъи бичIчIуларо
Дир гIамал буго, гьарулеб гьечIониги, гIадамазе кумек гьабизе йортанхъулеб. Амма гьеб кидаго данде хIалтIулеб букIинги халлъана дида. Цо-цоязда кколеб буго кумек гьабизе дида тIадаб бугиланцин. Масала, школалдаса дирго лъимал рачине индал, кидаго мадугьалалъул лъималги рачунаан дица машинаялдаги рекIинарун. Цо къоялъ рачинчIого тедал, дир хIакъалъулъ лъикIаб гуреб гIемераб хабар бицун батана. ГIарцудалъун гьудулалъеги кумек гьабулаан. Дида бихьана жиндиего щолеб гIарац гьелъ исрап гьабулеб букIин, ай кколареб бакIалдаги хвезабун. Налъуда гIарац кьечIого тедал, гьелъие тушманлъун лъугьана дун.
Кинго бичIчIуларо гIада-мазулгун кин гIамал рекъезабизе кколебали.
Зайнаб, МахIачхъала
ГIалимчиясул жаваб
Вализабазул цояс абуна: «ЛъикIал гIамалал гьаричIого теялдаса цIуне, лъикIал гIамалаз мун Аллагьасул ﷻ разилъиялде вачуна», - ян.
ТIадегIанав Аллагьасе ﷻ бищун рокьулездасан ккола бищун гIадамазе пайда гьабулел. ЛъикIал гIамалал гьарулагоги ният букIине ккола гIицIго Аллагьасул ﷻ разилъи щвей.
Имам ШагIранияс бицана: «ГIали ал-Хавасида дица цIехана нилъер заманалда цо-цо гIадамазул тIабигIат хвеялъе гIилла щибилан. Гьес абуна: «Гьелъие гIилла буго цоцадехун рокьи ва гьудуллъи бижизабулеб жо гьез тей, ай цоцазе кумек гьаби, сайгъатал кьей ва цогидал лъикIал пишаби», - ян.
ГIадамаздаса нахъе жоги тIалаб гьабичIого, ракI-ракIалъ Аллагьасе ﷻ гIололъун гьабураб кумекалъ хIасил кьола дунялалдаги ахираталдаги.
Нилъее кумек гьабулесеги баркала загьир гьабизе кIочене бегьуларо. Абу Гьурайратидасан бицараб хIадисалда буго: «ГIадамазе баркала кьоларес Аллагьасеги ﷻ кьоларо», - ян. (Тирмизи)
Аварагасул ﷺ гьеб хIадисалъе гIалимзабаз гьабуна кIиго магIна. Цояз абуна, жиндие лъикIлъи гьабуралъухъ гIадамазе баркала кьоларес Аллагьас ﷻ кьурал рахIматазухъги щукруги гьабулароян. КIиабилез абуна, жиндие кумек гьабурасе баркала кьечIев чиясул щукру ТIадегIанав Аллагьас ﷻ къабул гьабуларин. Гьеб кIиябго баркала цоцада хурхараблъун бугин.
Гьединлъидал, данде гьабулеб жавабалъухъ балагьичIого, хIажатазе гьабулеб кумек тезе бегьуларо. Гьелдаго цадахъ Аллагьасеги щукру гьабила кумек гьабизе рес кьуралъухъ.
Психологасул жаваб
Кумек хIажат гьечIониги гьеб гьабизе мун йортанхъиго буго гьеб ишкалалъул аслу. Гьедин бугеб мехалда сверухъ ругез абизе рес буго жидеца дудасан кумекго гьарулеб букIинчIин абун. Гьелде тIадеги, дур суалалдасан бичIчIулеб буго, кумек гьабидал гьездасан жаваб щвеялъухъ мун ялагьун чIун йикIинги. Цинги гьезул рахъалдасан баркалацин гьечIеб мехалъ, квешги бихьулеб буго. Машгьураб биценалда буго: «Дуцаго гьабураб лъикIлъиги кIоча ва дуе гьабураб заралги кIоча», - ян. Гьел рагIабазда гIамал гьабуни, гьеб суалго баккиларо.
Ният бацIцIадаб батаниги, кIочене бегьуларо киналго разияб хIалалда чиясухъа вукIун бажарулареблъи. Нилъеца гьединал гIадамазул пикрабазул халгьабизего бегьуларо. Бажарараб кумекги гьабила ва нилъеего гьабулеб заралалъул халги гьабиларо.
Аллагьасул ﷻ цо валияс абун буго: «Дудаго тIаса лъугьун тезе кIолеб гIарцул къадар гурони налъуда кьоге», - ян. Гьелъул магIна ккола, нагагь дов чияс нахъбуссинабичIони, тIаса лъугьине кIвезе букIин.
Гьал малъа-хъваязда гIамал гьабуни, дуе гIезагIанго бигьалъиги ккезе буго.
