İftarı siqaretlə açmaq?
Siz Ramazanda oruc tutan və iftar vaxtını məhz... siqaret çəkmək üçün səbirsizliklə gözləyən bir insanı təsəvvür edə bilərsinizmi? Təəssüflə bildirmək istəyirik ki, belə insanlar, əfsuslar olsun ki, var. Yalnız ümid etmək qalır ki, Ramazanın bərəkəti sayəsində onlar, nəhayət, siqareti buraxa biləcək və bu zərərli vərdişdən əl çəkəcəklər.
Həmd olsun Uca Allaha, böyük bərəkətləri özündə cəmləşdirən mübarək Ramazan ayı başlamaq üzərədir. Müsəlmanlar bütün ili bu ayın gəlişini gözləyirlər. Uca Allahın "ümmətin ayı" adlandırdığı bu ayda bizə oruc tutmaq və vaxtımızı ibadətlə keçirmək imkanı verilmişdir. Hesab edirəm ki, orucun və oruc tutan şəxsin Uca Allah qatındakı dəyəri hər kəsə məlumdur.
Peyğəmbər (sallallahu əleyhi və səlləm) buyurmuşdur: «Qüdrətli və Uca Allah belə buyurdu: "Adəm övladının hər bir əməli özü üçündür, orucdan başqa. Çünki oruc yalnız Mənim üçündür və onun mükafatını Mən verəcəyəm"» (Buxari, Müslim).
Məlumdur ki, oruc tutan şəxsin ağzından gələn qoxu Allah qatında müşk ətrindən daha xoşdur və orucun savabı o qədər böyükdür ki, onun ölçüsü yalnız Allaha bəllidir.
İftarı siqaretlə açırıq?
Görürük ki, Ramazan ayında tutulan oruc nə qədər dəyərli bir ibadət, siqaret çəkmək isə nə qədər iyrənc bir günahdır. Buna baxmayaraq, bəzi müsəlmanlar birtəhər iftarlarını siqaretlə açmağı bacarırlar.
Bu yaxınlarda məğrib (axşam) namazından qayıdarkən bir tanışımı gördüm; binanın girişində dayanıb canfəşanlıqla siqaret çəkirdi.
— Salam əleykum, — deyirəm. — Necəsən, qonşu?
— Və əleykum salam... Çə-ə-ə-ətindir! — cavab verir. — Budur, orucumu açıram.
— Siqaretlə? — təəccüblənirəm.
— Bəs tərgitməyi sınamamısan? — Həmişə tərgitmək haqqında düşünürəm, — deyə utana-utana cavab verir.
— Səni əsla qınamıram, — deyib onu sakitləşdirirəm. — Amma yaxşı olar ki, qardaş, bu işdə tələsəsən.
Xülasə, biz təxminən on beş dəqiqə belə davranışın İslamda qadağan olması və siqaretin zərərləri haqqında danışdıq. Belə qərara gəldik ki, Ramazan ayı həm insanın özünə, həm də yaxınlarına hər iki dünyada bədbəxtlik gətirən bu zərərli vərdişi atmaq üçün ən münasib vaxtdır
Siqaret çəkmək haqqında qısaca
Araşdırmalar sübut etmişdir ki, siqaret tüstüsünün tərkibində 4000-dən çox kimyəvi maddə var. Onlardan 60-ı kanserogen hesab olunur ki, bu maddələr hüceyrənin genetik materialına zərər vurmaq və xərçəng xəstəlikləri yaratmaq qabiliyyətinə malikdir.
Siqaret çəkmək ölümcül nəticələnən üç əsas xəstəliyin inkişafına səbəb olur: ağciyər xərçəngi, xroniki bronxit və emfizema, həmçinin ürəyin koronar xəstəliyi. Tədqiqatçılar qeyd edirlər ki, ağciyər xərçəngi hallarının 85%-də siqaretlə əlaqə aşkar olunur.
Siqaret çəkmək təkcə siqaret çəkən insan üçün deyil, ətrafdakılar, xüsusilə də onun yaxınları üçün zərərlidir. Bu cür siqaretçəkmə bir çox xəstəliklərə səbəb olur ki, onların sırasında xərçəng və astma da vardır. Tütün tüstüsünün passiv şəkildə udulması qadınlarda sonsuzluğa, həmçinin siqaret çəkən şəxslə eyni mühitdə yaşayan (arvadı, qızı, anası, bacısı olan) qadının bətnindəki dölün müxtəlif xəstəliklərinə səbəb ola bilər.
Gördüyümüz kimi, siqaret təkcə çəkənin intihar vasitəsi deyil, həm də ətrafındakıların qətl alətidir ki, bu da İslamda ən ağır günahlardan biri sayılır. Hər altı saniyədə tütün bir can alır. Hər il siqaret çəkmək 5,4 milyon insanın ölümünə səbəb olur.
Uca Allah Quranda buyurur: “Özünüzü öldürməyin. Həqiqətən, Allah sizə qarşı rəhmlidir!” («Nisa» surəsi, 29-cu ayənin mənası).
Qeyd etmək lazımdır ki, siqaret çəkmək həm də ciddi maliyyə xərcləri tələb edən bir günahdır. Məsələn, əgər bir insan gündə orta hesabla 50-100 rubl siqaretə xərcləyirsə, bu, ildə minlərlə rubl edir. Ümumdünya Səhiyyə Təşkilatının (ÜST) məlumatına görə, bu gün planetimizin 1,3 milyard sakini tütün asılılığındadır. İndi təsəvvür edin ki, əgər dünyadakı bütün siqaret çəkənlər bu pulları xeyriyyə işlərinə xərcləsəydilər, hansı nəhəng rəqəmlər alınardı!
Allah bizə elə bir yardım və güc (tövfiq) versin ki, Allah Rəsulunun (s.ə.s) haqqında belə buyurduğu kəslərdən olmayaq: “Elə oruc tutanlar var ki, onların bu orucdan nəsibi ancaq aclıqdır və elə gecələri namaz üçün oyaq qalanlar var ki, onların bu ibadətdən nəsibi ancaq yuxusuzluqdur”.
