Исламы гәбул едиб мән баша дүшдүм ки, ҹәһаләт инсана чох зијан ҝәтирир
Гәрб өлкәләри сакин-ләринин күтләви сурәтдә Исламы гәбул етмәси инсанларын даһа чох диггәтини ҹәлб едир. Бу мәсәлә илә марагланан һәр кәси мүраҹиәт едәнләрин вә Ислама чевриләнләрин сајы һејрәтә ҝәтирир.
Бу һадисә ҹәмијјәтин вә ја иҹтимаи синфин бир тәбәгәсинин нүмајәндәләри илә мәһдудлашмыр. Исламы мүхтәлиф пешә саһибләри вә мүхтәлиф тәһсил сәвијјәли инсанлар гәбул едирләр.
Исвечли Мајкл Белехио неҹә Исламы гәбул етди
Белә јени дин гәбул едәнләрдән бири дә Исламы гәбул едәндән сонра өзүнә Ибраһим ады ҝөтүрмүш исвечли Мајкл Белехио олду. О, Исламы гәбул етмәји һаггында еланла мәһдудлашмајыб дәрһал өз динини өјрәнмәјә башлады.
Ондан әлавә, Уппсала шәһәриндә (Исвечдә гәдим шәһәр, Уппланд тарихи әјаләтиндә Стокһолмдан 70 км шималда јерләшмишдир) Ислам мәктәби (мәдрәсә) ачмышдыр ки, Исвеч мүсәлманларынын ушаглары лајигли дини тәһсил алсынлар.
“Әл-Ҹәзаир Тајмс” нәшринин суалларына ҹаваб верәрәк Мајкл (Ибраһим) өз һәјатындан вә Исламла таныш олмағындан данышмышдыр:
“Нә гәдәр өзүм јадымдајам, бүтүн өмрүм боју билмишәм ки, Аллаһ вар, лакин бу инам һеч ҹүр һәјатымын ҝедишинә тәсир ҝөстәрмирди. Бу әгидә, бу инам бир мәканда иди, мән исә проблем вә чәтинликлә долу башга мәканда јашајырдым. 14 јашым оланда анам вәфат етмиш, атам исә башга вилајәтә көчүб орада јашамаға галмышды. Тәрбијәмлә мәнә чох сәрт јанашан бөјүк гардашым мәшғул олурду. Буна ҝөрә дә мән алкогол вә наркотикләрә алудә олмаға башладым.
Шүкр Аллаһа, мән Ислам һаггында билдим. Јени дин илә танышлыг мәнә сакитлик, арамлыг, һәјатда инам вә тәһлүкәсизлик дујғусу верди. Ислам мәни сәһв, јанлыш фикирләр зүлмәтиндән ајдын ишыға кечирди. Ислам һаггында билик әлдә едән кими баша дүшдүм ки, ҹаһиллик инсана нә гәдәр зијан верир.
17 јашымда мән тәсадүфән Еритрендән Исвечдә јашајан бир аиләјлә таныш олдум. Мән бу аиләдә гонаглыгда оланда, биз тез-тез мүбаһисә едир вә мүхтәлиф динләр, о ҹүмләдән Ислам вә бу динин хүсусијјәтләри һаггында мүзакирә апарырдыг.
Бу дикуссијалара мән о гәдәр дә әһәмијјәт вермирдим. Анҹаг, етираф едим ки, онлар хошума ҝәлир вә јаваш-јаваш мәнә јахшы тәсир ҝөстәрмәјә башлады. Ијирми јашым битәндә мән исвеч дилиндә тәфсирләрлә Гуран әлдә едиб, орада јазыланларын һамысыны дәрк едәрәк охумаға башладым. Бу мәгамда мәним үчүн әввәл охудуғум Инҹил вә о вахт таныш олдуғум Гуран арасында тәмас нөгтәләри тапмаг ваҹиб иди.
Гејд етмәк лазымдыр ки, Еритрендән о аилә мәнә дејирди ки, Гуран мүсәлманлар үчүн мүгәддәс китабдыр вә дәстәмазсыз она тохунмаг олмаз. Буна ҝөрә дә Гуран охумамышдан габаг онлар мәнә дәстәмаз алмағы мәсләһәт ҝөрдүләр вә ону неҹә етмәји өјрәтдиләр. Мән һәр дә автоматик олараг Гуран охумамышдан габаг дәстәмаз алырдым.
Гуран мәналарынын тәрҹүмәсини сатын алараг ону вә дәстәмаз алмағын гајдасы јазылмыш кағыз вәрәгини чантама гојуб евә јолландым. Ванна отағына ҝириб һәмин вәрәгдә јазылмыш гајда үзрә дәстәмаз алмаға башладым.
Дәстәмазы гуртарандан сонра гәлбимдә нурланма вә гәрибә, чох јахшы арамлыг, динҹлик һисс еләдим. Дәстәмаздан сонра Гураны охумаға башладым.
Аллаһ Бөјүкдүр! Гураны охујанда мәни мүхтәлиф фикирләр чулғалајырды: дахили севинҹ вә үрәјимин ачылмасы. Мән дәрк етмәјә башладым ки, гејри-ихтијари, өзүмдән асылы олмајараг мүсәлман олдум. Мән јорулмадан Гуран охумағы давам едирдим... Мән Гураны вә бу мөвзуда башга китаблары охумаға башладығым вахтдан үч һәфтә кечди вә мән шәһадәт сөјләдим.
Мән Исламы гәбул етдим, лакин мәсҹидә ҝедиб орада һамынын гаршысында өз гәрарымы елан едә билмәдим. О вахт мән фикирләширдим ки, мүсәлманлар, гәрб күтләви информасија васитәләринин тәсвир етдији кими, узун сых, галын саггаллы горхулу инсанлардыр, һәмишә өзләри илә бычаг ҝәздирир вә јолда онлара раст ҝәләнләрин һамысыны өлдүрмәјә һазырдырлар.
Лакин, мән һәр һалда ҹүрәт едиб мәсҹидә јоллананда орада мәнә һәр шејдә көмәк етмәјә һазыр олан мүсәлманлардан јалныз һөрмәт ҝөрдүм.
Ислам Авропада чох тез јајылыр. Демәк олар ки, Авропада бу динин бөјүк ҝәләҹәји вар. Мән мүсәлман олан вахтдан бу ҝүнә кими Авропада минләрлә јени инсанын Исламы гәбул етдијинин шаһиди олмушам.
Буна ҝөрә дә мән әминәм ки, тезликлә Ислам Авропада ән чох јајылмыш дин олаҹыгдыр. Ҝөтүрәк, мәсәлән, Франсаны: Ислама гаршы (зидд) апарылан ишә бахмајараг, бурада бу дин гәрибә, тәәҹҹүблү сурәтдә инкишаф едир вә јајылыр. Чүнки Пејғәмбәр ﷺ һәдисиндә билдирилир ки, бу дин јер үзүнүн бүтүн ҝушәләринә чатаҹагдыр”.
Тәмим Әл-Дәридән нәгл олунур ки, о, Аллаһ Елчисинин ﷺ белә дедијини ешитмишдир:
“Бу иш (јәни Ислам) мүтләг ҝүндүз вә ҝеҹә олан һәр јердә олаҹаг, вә Аллаһ нә ҝилдән, нә дә јундан бир ев вә ја јашајыш јери гојмајаҹагдыр ки, ораја бу дин дахил олмасын...” (Имам Әһмәд, 16344).
Онун Исламы гәбул етмәк гәрарына гоһумлары, јахынлары вә бүтөвлүкдә ҹәмијјәт нә ҹүр мүнасибәт ҝөстәрмәси һаггында Мајкл Белехио бунлары данышмышдыр:
“Әввәлҹә чох чәтин иди. О вахт мән чох ағыр сынаглара дөздүм. Аиләм тамамилә мәндән үз дөндәрди. Мән шеј-шүјүмү јығышдырым еви тәрк етдим вә мәсҹидләрдә јахуд лүтфкарлыгла мәнә гапы ачан достларымҝилдә ҝеҹәләмәјә мәҹбур олдум.
Ән јахын инсанлар мәнимлә әлагәләри кәсиб һәтта һарда галдығымы билмәк истәмәдиләр. Мәни ән чох кәдәрләндирән дә бу олду. Лакин мән өз динимдән кәнарлашмадым вә Ислама етигадымы давам едирдим. Белә мөвге, белә вәзијјәт тәкҹә гоһумларымла арамызы вурмады, офисдә, иш базарында вә бүтүн Исвеч ҹәмијјәти илә мәним тез-тез конфликтләрим, тоггушмаларым олурду”.
О, һәм дә Jyllands-Posten Данија гәзетиндә Мүһәммәд Пејғәмбәрә ﷺ карикатураларын нәшр едилмәсинә даир өз фикрини билдирмишдир:
“Ҝөрдүјүм кими, Jyllands-Posten гәзетинин бу һәрәкәтләри чох бөјүк кобуд, тәһгир вә мүгәддәсә гәсд етмәкдир. Биз әввәлҹә өзүмүздән сорушмалыјыг: нијә Jyllands-Posten буну етмишдир? Нијә бу нәшрләр Ислам дәјәрләри һаггында анлајышы олмајан әксәр авропалыларын дәстәјини алмышдыр? (Гәрбин әсас гәзетләри, данијалы һәмкарлары илә һәмрәј олараг бу шәкилләри јенидән чап етмишләр).
Бундан нәтиҹә чыхарараг, биз Гәрбә Исламын мәдәни симасыны ҝөстәрмәјә вә Ислам мәдәнијјәтинин нә олдуғуну һамыја вә һәр кәсә чатдырмаға чалышмалыјыг.
Мәним фикримҹә, Пејғәмбәр ﷺ сирәти (тәрҹүмеји-һалы) мүасир шәраитдә истифадә едә биләҹәјимиз онларҹа дәрс вә ибрәтлә долудур. Пејғәмбәрә ﷺ даш атмыш, саташмышлар, онун евинин габағында зибил гојмушлар... бунларын һамысына исә Аллаһ Рәсулу ﷺ өзүнүн үлви хасијјәти, ҝөзәл әхлагы илә ҹаваб вермишдир, вә бу һәтта онун дүшмәнләрини нәтиҹәдә Исламын әзәмәтини, ҹалалыны етираф вә гәбул етмәјә мәҹбур етмишдир”.
“Исламы гәбул етмәк сизә нә верди?” - суалына ҹаваб верәрәк Мајкл Белехио демишдир:
“Ислам мәнә һәр шеј верди, арамлыг вә әмнијјәт, әмин-аманлыг верди. Ислам мәнә шәхси вә иҹтимаи сәвијјәдә һәр шеји өјрәтди, аилә ичиндә неҹә рәфтар етмәји өјрәтди. Исламда мән өмрүн мәнасыны вә өз мәгсәдими, ролуму, вәзифәми тапдым. Исламын мәнә вердикләринин һамысыны белә садәҹә садаламаг да олмаз”.
