Къимат кIудияб как
Паризаял какал гурелги, муъминчиясе лъикIаб буго суннатал какал разеги. Суннатазда гьоркьоса хасго къиматаблъун ккола къаси сардилъ рахъун балеб тагьажудалъул как.
Тагьажудалъул какги ккола Аварагасул ﷺ суннат. Аварагас ﷺ гьеб гьоркьоса къотӀичIого балеб букӀана ва унтаниги толебги букIинчIо.
ГӀабдуллагь ибну Абу Къайсидасан бицараб хӀадисалда буго, ГӀайшатица абун бугин: «Нужеца къаси балеб как рехун тоге, хӀакълъунго, Аллагьасул Расулас ﷺ гьеб рехун течӀо, унтун яги свакан вукӀун ватаниги. Гьеб мехалъ гьес гӀодов чӀун балеб букӀана», - ян. (Абу Давуд, 1307)
Как ккола муъминчияс гьабулеб бищун лъикӀаб гӀибадат. Гьелъул къиматги букӀуна ракӀбацӀцӀадго гьабулеб бугони. Амма къаси гьабулеб гӀибадаталъулъ букIуна бищунго кIудияб ракӀбацӀцӀалъи ва дагьаб рияъ.
Абу Гьурайратидасан бицараб хӀадисалда буго Аллагьасул Расулас ﷺ абунин: «Рамазаналдаса хадуб кӀал кквезе бищун лъикӀаб ккола МухӀаррам моцӀ, паризаяб какалда хадуб бищунго лъикӀаб буго къаси рахъун балеб как». (Имам АхӀмад, 7534; Муслим, 1163; Абу Давуд, 2429; Тирмизи, 438; ибн ХӀиббан, 3636)
Тагьажуд ккола боголил какдаса хадуб, рогьалил как базе заман щвезегӀан гьоркьоб бугеб мехалда базе бегьулеб как.
Тагьажудалъул бищун дагьаб кӀиго ракагӀат буго, бищун цӀикӀкӀун - къадар чIезабун гьечIо. Гьеб гӀемер барабгIан лъикӀаб буго. Цо-цо гӀалимзабаз абула тагьажудалъул какил бищун дагьаб ракагӀат кӀиго, бищун цӀикӀкӀун анцӀила кӀиго, гьоркьохъеб анлъго ракагӀат бугиланги.
Суннатаб буго тагьажуд базе рахъинаризе агьлу-хъизан, гьезиеги ТIадегIанав Аллагьасул ﷻ рахIмат щвезе.
Аллагьас ﷻ къуват кьеги нилъее гьеб какда тIадчIей гьабизе.
