Kəbəni kim dağıtmağa cürət edəcək?
Kəbə İslamın ən böyük nişanələrindən biridir. Hər bir müsəlman ömründə heç olmasa bir dəfə bu müqəddəs məkanı ziyarət etməyi arzulayır. Məscidül-Həram, onun içərisində yerləşən Kəbə və Mədinədəki Peyğəmbər ﷺ məscidi müsəlmanlar üçün yer üzünün ən müqəddəs məkanlarıdır. Buna görə də bu müqəddəs yerlər hər bir möminin qəlbində çox uca bir məqama malikdir. Həmçinin Qiyamət gününədək bütün müsəlmanların namazda üz tutduqları qiblə də Kəbədir.
Kəbə yer üzündə Allahın ibadəti üçün inşa edilən ilk evdir. Rəvayətlərə görə, onu ilk dəfə mələklər tikmişlər. Daha sonra Kəbə ilk dəfə Adəm peyğəmbər tərəfindən yenidən inşa edilmişdir. Uca Allah Qurani-Kərimdə bildirir ki, bu, Ona ibadət etmək üçün qurulan ilk binadır.
Sonra Uca Allahın əmri ilə İbrahim peyğəmbər oğlu İsmayıl ilə birlikdə Kəbənin divarlarını yenidən ucaltdılar ki, o, iman gətirənlər üçün həcc və ziyarət məkanı olsun.
Kəbənin dağıdılması
Qeyd edildiyi kimi, Kəbə dünyanın bütün müsəlmanları üçün müqəddəs bir məkandır. Hər bir mömin onu qorumağa hazırdır. Lakin müsəlman ilk dəfə Qiyamətə yaxın Kəbənin dağıdılacağını eşitdikdə, təəccüblə soruşur: Necə ola bilər? Məgər müsəlmanlar onun dağıdılmasına yol verəcəklərmi?
İndi isə Peyğəmbərin ﷺ hədislərinə əsasən Kəbəni kimin dağıdacağı barədə məlumat verək.
Müqəddəs Kəbənin dağıdılması Qiyamət gününün böyük əlamətlərindən biridir. Peyğəmbər ﷺ bu barədə xəbər vermişdir. Səhih hədislərdə bildirilir ki, bunu Həbəşistandan olan bir şəxs həyata keçirəcək.
Peyğəmbər ﷺ buyurmuşdur: “Kəbəni Həbəşistandan olan, ayaqları qısa və nazik bir kişi dağıdacaq.” (İmam əl-Buxari və İmam Müslim rəvayət etmişlər).
Səhih hədislərdə Peyğəmbər ﷺ Kəbəni dağıdacaq şəxsi keçəl, ayaq oynaqları əyri və ayaqları qısa, nazik olan bir adam kimi də təsvir etmişdir.
Abdullah ibn Əmr ibn əl-Asdan rəvayət olunur ki, Allahın Elçisi ﷺ buyurmuşdur: “Kəbəni Həbəşistandan olan qısaayaqlı bir kişi dağıdacaq. O, Kəbənin bəzək əşyalarını talan edəcək, örtüyünü götürərək divarlarını açıq qoyacaq. Sanki mən ona baxıram: o, keçəl və ayaqları əyridir. O, Kəbəni bel və külünglə dağıdacaq.” (İmam əl-Buxari, № 1591; İmam Müslim, № 2909).
Əbu Hüreyrədən rəvayət olunur ki, Allahın Elçisi ﷺ buyurmuşdur: “Kəbənin toxunulmazlığını yalnız ona hörmət edənlər pozacaqlar. Bu baş verdikdə, ərəblərin üzərinə böyük bir fəlakət gələcək. Sonra həbəşlilər gəlib Kəbəni bünövrəsinə qədər dağıdacaqlar və bundan sonra o, bir daha heç vaxt yenidən tikilməyəcək. Onun xəzinələri də onların əlinə keçəcək.” (İmam Əhməd rəvayət etmişdir).
Bu nə zaman baş verəcək?
Bütün bu hörmətsizlik və müqəddəsliyə qarşı edilən təcavüz Qiyamət gününə yaxın zamanlarda baş verəcək. O vaxt yer üzündə Allahı zikr edən və Uca Allahı tanıyan heç bir insan qalmayacaq. Məhz buna görə də onlar yer üzündə ibadət üçün inşa edilən ilk ev olan Kəbəni yenidən bərpa edə bilməyəcəklər.
Böyük alim İbn Həcər əl-Əsqəlani özünün “Fəthul-Bari” kitabında Müqəddəs Kəbənin dağıdılması haqqında belə yazır: “Bütün bunlar Qiyamətə yaxın baş verəcək. O zaman yer üzündə “Allah, Allah...” deyən heç bir insan qalmayacaq. Bu barədə İmam Müslimin rəvayət etdiyi səhih hədisdə xəbər verilmişdir.”
Ənəs ibn Malikdən rəvayət olunur ki, Allahın Elçisi ﷺ buyurmuşdur:
“Qiyamət o zaman qopacaq ki, yer üzündə “Allah! Allah!” deyən heç kəs qalmayacaq.”
Burada bir çox insanın ağlına Uca Allahın buyurduğu müqəddəs ayə ilə bağlı sual gələ bilər: “Məgər onlar görmürlərmi ki, Biz Məkkəni təhlükəsiz və müqəddəs bir yer etdik, halbuki onların ətrafındakı insanlar tutulub aparılırlar?” (“əl-Ənkəbut” surəsi, 67-ci ayə).
Yuxarıda qeyd olunanlar heç bir şəkildə bu Qurani ayəyə zidd deyil.
Birincisi, Kəbənin dağıdılması bilavasitə Qiyamət gününün yaxınlığında baş verəcək. O zaman ən qeyri-adi və ağlasığmaz hadisələr baş verəcək.
İkincisi, buna səbəb Kəbəyə hörmət etməli və Uca Allahın ﷻ əmrlərinə qeyd-şərtsiz tabe olmalı olan insanların özlərinin törətdikləri azğınlıqlar olacaq.
Üçüncüsü, Məkkə öz tarixində bir neçə dəfə döyüşlərin baş verdiyi yer olmuşdur. Buna nümunə olaraq hicri V əsrdə Məkkəyə karmatların hücumunu göstərmək olar. Hicri 317-ci ildə, həcc mövsümünün ilk günündə onlar müsəlmanlara hücum etmiş, çoxlu möminləri öldürmüş və qarət etmişdilər. Onlar Məscidül-Həramın ərazisində, hətta Kəbənin daxilində belə hacıları öldürməyə cürət etmişdilər. Həmçinin Zəm-zəm quyusunun üzərindəki örtüyü dağıtmış və Kəbənin örtüyünü (kisvəni) çıxarmışdılar.
Bütün bunlar Qurani-Kərimin bu uca ayəsinə zidd deyil. Əksinə, bu, onu göstərir ki, Uca Allah müsəlmanlara hikmətli hökmlərinə itaətsizlik etməyə başladıqları zaman müxtəlif sınaqlar göndərir.
Qiyamət saatının yer üzündə “Allah! Allah!” deyən heç kəs qalmadığı bir vaxtda başlayacağını düşünmək belə ağırdır.
Bəs bizə nə qalır? Cəmiyyətdə fitnə-fəsad əlamətlərini gördükdə və səhih mənbələrdən bildikdə ki, Qiyamət günü yaxınlaşdıqca mömin insanın qarşılaşacağı çətinliklər daha da artacaq, necə səbir etməliyik?
Bizim üzərimizə düşən Uca Allahdan bizi – müsəlmanları – fitnələrdən qorumasını diləməkdir. Əlbəttə, dərk etməliyik ki, başımıza nə gəlirsə-gəlsin, bizimlə bağlı nə baş verirsə-versin, bunların hamısı Uca Allahın təqdiri ilədir. O, Öz bəndələrini sınağa çəkir.
Allah bizə, müsəlmanlar olaraq, qarşılaşdığımız imtahanlardan ləyaqətlə keçmək üçün güc versin və Onun razılığına nail olmaq üçün bizə böyük səbir nəsib etsin!
Amin!
