Ҹәннәтә ҝәтирән севҝи
Ҹәннәтә ҝәтирән севҝи
Уҹа Аллаһ бујурур (мәнасы): “Сән онлара де ки, ја Пејғәмбәр: Мән - Аллаһын Елчисијәм вә сизи Онун дининә чағырырам. Әҝәр сиз Аллаһ-тәаланы севирсинизсә, ардымҹа ҝәлин вә мәнә табе олун, онда Јарадан сизи севәр, сиздән разы галар вә ҝүнаһларынызы бағышлајар!” № (3:31).
Һәзрәти Пејғәмбәрин ﷺ һәдисиндә дејилир: “Ким мәни севәрсә, Аллаһы да севәр. Ким мәнә итаәт етсә, Аллаһа да итаәт едәр”.
Һәгигәтән, Јарадан Өз Елчисинә гулаг асмағы вә итаәт етмәји вә Өзүнә итаәт етмиш вә Өзүнә олан севҝини Пејғәмбәрә севҝи илә бағламышдыр. Чүнки һәгигәтән, Јараданымызын јаратдығы һәр шејдән, сон Пејғәмбәр, бүтүн пејғәмбәрләрин Пејғәмбәри - Муһәммәд Онун ән һөрмәтли, әзиз вә севимли јарадылышыдыр. Бөјүк Аллаһы вә Онун Пејғәмбәри Муһәммәди севән мөмин, шүбһәсиз ки, һәмишә Јараданын дининин бүтүн ҝөстәришләринә әмәл етмәјә чалышаҹагдыр.
Бир ҝүн Пејғәмбәрин сәһабәси она дејир: “Еј Аллаһын Рәсулу, мән сәни һәр шејдән чох севирәм, амма өзүмә севҝи үстүнлүк тәшкил едир”. Буна Пејғәмбәр ﷺ ҹаваб верир: “Муһәммәдин руһу игтидарында олан Аллаһа анд олсун ки, һеч бириниз мәни өзүндән чох севмәјинҹә мүкәммәл имана саһиб олмајаҹагсыныз”. Бир мүддәт сонра Өмәр дејир: “Аллаһа анд олсун ки, инди мән сәни өзүмдән чох севирәм!” Пејғәмбәр ﷺ ҹаваб верди: “Инди иманын тәкмилләшди, еј Өмәр”.
Аллаһа мүкәммәл иман - һәр бир инсанын сәј ҝөстәрмәли олдуғу ән јүксәк мәгсәддир, чүнки һәгиги вә дүзҝүн иман - бу дүнјада вә О дүнјада хошбәхтлијин ачарыдыр. Вә бу әзиз инанҹын дәстәји вар ки, онсуз о, тамдәјәрли ҝөрүнмүр вә бу дәстәк, - шүбһәсиз ки, Аллаһ севҝисинә ҝәтирән Муһәммәд ﷺ Пејғәмбәрә олан севҝидир.
Гуранда дејилиб ки, Уҹа Аллаһ сон Пејғәмбәри јалныз бүтүн аләмләрә мәрһәмәт вә гуртулуш кими ҝөндәрмишдир. Јарадан Гуранда ону тәкҹә өзүнү дејил, бүтүн бәшәријјәти бәзәјән ән јүксәк рәфтар, үлви хасијјәт саһиби адландырараг тәрифләјир. Пејғәмбәрин зөвҹәси Аишәдән (Аллаһ ондан разы олсун) онун әхлагы барәдә сорушданда о, Пејғәмбәр әхлагынын Гуранла тамамилә ујғун олдуғуну, јәни Гуранда бәһс едилән бүтүн јахшы кејфијјәтләрә саһиб олдуғуну демишдир. О, бүтүн бәшәријјәт үчүн өрнәкдир.
Пејғәмбәри ﷺ севмәк ону уҹалтмаг вә һөрмәт етмәк, шүбһәсиз ки, бүтүн пејғәмбәрләрин дини олан Исламын јајылмасына сөз вә әмәллә көмәк етмәк, онун әхлаг вә кејфијјәтләрини мәнимсәмәк, Сүннә вә Шәриәтинә риајәт етмәк демәкдир. Пејғәмбәр демишдир: “Нә илә ҝәлдијим һәр шеји севмәјинҹә һеч бириниз иман ҝәтирмәзсиниз”.
Аллаһ Рәсулуна севҝи - бүтүн диндар вә салеһ инсанларын сәј ҝөстәрдикләри мүттәгилијин, Аллаһдан горхмағын јүксәк дәрәҹәси вә әсасыны тәшкил едир. Пејғәмбәрин сәһабәләри вә сонракы мүсәлман нәсилләри Аллаһ Рәсулуну о гәдәр севмиш, бу севҝи онлара о гәдәр нүфуз етмишдир ки, онлар јүксәк дәрәҹәдә камиллијә чатмыш вә мөминләр үчүн нүмунә олмушлар.
Пејғәмбәрин сәһабәси Әбу Бәкр - пејғәмбәрләрдән сонра инсанларын ән јахшысы - ону һәјатындан даһа чох севирди вә һәмишә онун үчүн өзүнү гурбан вермәјә һазыр иди. Мәккәдән Мәдинәјә көчәркән о вә кафирләр тәрәфиндән тәгиб олунан Пејғәмбәр Сәвр мағарасына чатанда, Әбу Бәкр Пејғәмбәрә һеч бир шеј тәһдид етмәдијинә әмин олмаг истәји илә ораја биринҹи дахил олур. О, јери тәмизләјир вә чијин өртүјү илә дешикләри бағлајыр, галан бир дәлији исә ајағы илә өртүр. Бундан сонра Рәсулүллаһ мағараја ҝирир вә башыны архадашынын дизләринә гојуб јатмаға узаныр. Әбу Бәкри илан санҹыр, анҹаг о, Пејғәмбәри нараһат етмәмәк үчүн һәтта јериндән тәрпәнмир, лакин онун ҝөз јашы Аллаһ Рәсулунун үзүнә дүшәндә ојаныр вә баш верәни сорушур. Әбу Бәкр ҹаваб верир: “Мәни илан санҹды”, вә онда Аллаһ Рәсулу санҹылан јери түпүрҹәклә исладыр вә ағры кәсилир.
Әбу Бәкр һәмишә Пејғәмбәрин ﷺ јанында олур вә һәр шејдә она көмәк едирди. Ислам вә Пејғәмбәр наминә чох чәтинликләр чәкмишдир. Бир дәфә о, Пејғәмбәри ﷺ мүдафиә едәндә бүтпәрәстләр ону елә бәрк дөјүрләр ки, инсанлар онун артыг өлдүјүнү дүшүнүрдүләр. Өзүнә ҝәләндә илк сөзләри бунлар иди: “Пејғәмбәрә нә олуб? О һарададыр? Мәни онун јанына апарын!” О, Пејғәмбәри ﷺ беләҹә чох севир вә уҹалдырды, Аллаһ ондан разы олсун!
Әли Ибн Әби Талибдән сорушдулар: “Сиз Рәсулүллаһы неҹә севирдиниз?” О, ҹаваб верди: “Аллаһа анд олсун ки, биз ону өзүмүздән, малымыздан, өвладларымыздан, валидејнләримиздән даһа чох севирдик”. Пејғәмбәрин ﷺ бүтүн сәһабәләри ону өзләриндән даһа чох севир вә онун үчүн ҹанларыны гурбан вермәјә һазыр идиләр. Белә ки, бүтпәрәстләр Зејд ибн Дәснә адлы сәһабәни јахалајыб ону өлдүрмәк истәјәндә, о заман кафир олан Әбу Суфјан чыхыб ондан сорушду: “Еј Зејд, Муһәммәдин инди сәнин јериндә, сәнин исә евдә олмағыны истәрдинми?” Зејд ҹаваб верди: “Аллаһа анд олсун ки, Муһәммәдә бир тикан белә батмасыны истәмәздим”. Вә Әбу Суфјан деди: “Мән сәһабәләр Муһәммәди севдији гәдәр киминсә бирини севдијини ҝөрмәдим”.
“Аллаһы севин, чүнки о сизә лүтф вә немәтләр бәхш едир, вә Аллаһын мәнә олан севҝисинә ҝөрә мәни севин вә аилә үзвләрими онлара олан севҝимә ҝөрә севин” (һәдис).
Сәһабә Сәвбан бин Малик Пејғәмбәри ﷺ о гәдәр бәрк севирди ки, ону ҝөрмәјәндә чох кәдәрләнирди. Вә бир дәфә о, үзүндә кәдәрлә Пејғәмбәрин јанына ҝәләндә Пејғәмбәр ондан сорушду: “Сәнә нә олуб?” Сәвбан ҹаваб верди: “Ја Рәсулүллаһ, мән хәстә дејиләм, амма сәни ҝөрмәдијим заман ҝөрүшәнә гәдәр чох тәнһалыг вә кәдәр һисс едирәм. Сонра ахирәт һәјаты һаггында дүшүнүр вә горхурам ки, сәни О дүнјада ҝөрмәрәм, чүнки сән пејғәмбәрләрлә бирликдә олаҹагсан”. Онда Уҹа Аллаһ ајә назил етди, онда дејилир ки, Аллаһа вә Онун Елчисинә итаәт едәнләр о дүнјада пејғәмбәрләр, салеһләр вә шәһидләрлә бирликдә олаҹаглар. Вә Рәсулүллаһ бу ајәни охудугда Сәвбан чох севинди, чүнки әбәди һәјатда онунла бирликдә олаҹағына үмид парлады.
Сәһабәләрдән бири хүтбә охујан Пејғәмбәрин ﷺ јанына ҝәлиб Гијамәт ҝүнүнүн нә вахт олаҹағыны сорушур. “Бәс сән бу ҝүн үчүн нә һазырламысан?”, - дејә Пејғәмбәр ﷺ сорушур. О, ҹаваб верир: “Мән чохлу дуа, оруҹ вә сәдәгә һазырламамышам, амма мән Аллаһы вә Онун Елчисини севирәм”. Онда Пејғәмбәр ﷺ дејир: “Сән севдијинин јанында олаҹагсан”. Сонралар сәһабә Әнас демишдир: “ Вә Исламдан сонра биз Аллаһ Рәсулунун ﷺ дедијинә севинән гәдәр һеч нәјә севинмәмишдик: “Сән севдијинин јанында олаҹагсан”. Сонра Әнас әлавә етмишдир: “Мән дә Муһәммәди ﷺ, Әбу Бәкри вә Өмәри севирәм вә үмид едирәм ки, онларла бирликдә Ҹәннәтдә олаҹағам”.
Пејғәмбәрин ﷺ вәфатындан сонра јашајан сәһабәләр ону даһа да чох севмишләр. Онлардан биринин өлүмү јахынлашанда севинирди, чүнки тезликлә Аллаһ Рәсулу илә ҝөрүшәҹәјини билирди. Пејғәмбәрин мүәззини Билалын өлүмү јахынлашанда онун зөвҹәси ағламаға башлады: “Кәдәр!”. О исә деди: “Неҹә дә севинҹ вә хошбәхтлик, сабаһ истәклиләрим - Муһәммәд вә онун сәһабәләри илә ҝөрүшәҹәјәм”.
Имам Малик Пејғәмбәри ﷺ чох севән вә уҹалданлардан бири иди. О, Пејғәмбәр һәдисләрини дәстәмаз алмадан охумазды, һәдиси охумаға башлајанда исә охумасыны һеч бир шејлә кәсмәзди. Бир дәфә Пејғәмбәр ﷺ мәсҹидиндә һәдис охујаркән имам Малики әгрәб бир нечә дәфә ајағындан санҹды, амма о јенә дә һәдисин охунмасыны дајандырмады. О, һәмчинин Мәдинәдә ата минмәзди, һалбуки буна еһтијаҹы варды, Пејғәмбәрин ҝәздији вә дәфн олундуғу торпағы һејван дырнаглары илә тапдаламагдан утандығыны дејирди.
Әлбәттә ки, сәһабәләр вә мүсәлманларын Муһәммәд Пејғәмбәрә олан севҝиси һаггында нә демәк олар ки, һәтта ҹансыз ҹисимләр дә онун һәсрәтини ифадә едирдиләр! Мүсәлманлар трибуналардан (минбәр) истифадә етмәјә башламаздан әввәл Пејғәмбәр ﷺ мәсҹиддә олан хурма ағаҹынын ҝөвдәсинә сөјкәнәрәк хүтбә охујурду. Сәһабәләр трибуна дүзәлдәндә исә, Аллаһ Рәсулу хүтбәни орадан охумаға башлады. Һәмин ҝүн мәсҹиддә олан бүтүн мүсәлманлар хурма ағаҹындан ҝәлән јүксәк инилти, она ҝүҹлү севҝи вә һәсрәтдән инилти ешитдиләр. Онда Пејғәмбәр ﷺ күрсүдән ениб ону сакитләшдирди. Бу, бүтүн мүсәлман дүнјасына мәлум олан етибарлы әһвалатдыр.
Пејғәмбәр демишдир: “Аллаһы севин, чүнки О сизә лүтф вә немәтләр бәхш едир, Аллаһын мәнә олан севҝисинә ҝөрә мәни севин вә аилә үзвләрими онлара олан севҝимә ҝөрә севин”. Әҝәр бир инсан диҝәрини севирсә, севҝилиси илә әлагәли һәр шејә олан севҝи санки севҝи ганунудур. Мәсәлән, шәхс севҝилисинин евини, аиләсини, күчәсини, гоншуларыны, һәјәтиндәки ев һејванларыны севир. Буна ҝөрә дә тәкҹә Пејғәмбәрин өзүнү севмәк кифајәт дејил, онунла әлагәли һәр шеји, о ҹүмләдән аиләсини, ушагларыны вә с. севмәк вә уҹалтмаг лазымдыр.
Пејғәмбәри тәсвир едәркән Әли ибн Әби Талиб дејирди: “О, инсанларын ән сәхавәтлиси, бәшәријјәт арасында ән доғру, хасијјәтҹә ән мүлајим вә јумшаг вә мәншәҹә ән нәҹиб иди. Онунла таныш олан һәр кәс она ашиг олурду. Ону характеризә едән һәр кәс дејирди: “Мән һеч вахт ондан әввәл дә, сонра да онун кими адам ҝөрмәмишәм”.
Аллаһ бүтүн мүсәлманлара Пејғәмбәрә сәмими севҝи, һәр шејдә онун ардынҹа ҝетмәји бәхш етсин вә Гијамәт ҝүнү бизи онунла бирликдә галдырсын! Амин.
