Һәҹҹ үчүн неҹә пул јығмаг олар?
Һәҹҹ үчүн неҹә пул јығмаг олар?
Лап тезликлә бүтүн дүнјанын һава лиманлары минләрлә хошбәхт мүсәлманла долаҹаг - ҝүнәшдә јанмыш, ҝөзләри ҝөрүнмәмиш севинҹдән ҝөз јашлары илә долу, додагларында Зәм-зәмин тәмиз су дады илә вә үрәкдә һејрәтамиз бир раһатлыг илә.
Һәр ил биз һәјатында әсас сәјаһәт – Мәккәјә һәҹҹ зијарәти едән гоһумларымызы, достларымызы, һәмкарларымызы јола салыр вә гаршылајырыг. Һәр ил биз онлар үчүн сәмим-гәлбдән севинәрәк онлардан дуа етмәләрини хаһиш едир, мүгәддәс торпагдан ҹанлы јајымлары изләјир, һәдијјә олараг тәсбеһ алыр вә өзүмүзә дејирик: јахшы, нә вахтса бу хошбәхт инсанларын јериндә мән дә оларам. Анҹаг ил ардынҹа ил кечир вә онлар ОРАДА, биз исә БУРАДАЈЫГ. Ҝәлин өзүмүзә гаршы дүрүст олаг, әҝәр биз Мәккәни ҝөрмәк, Кәбәјә тохунмаг арзумуза доғру конкрет вә инамлы аддымлар атмаға башламасаг, бу мифик “нә вахтса” ҝәлмәјәҹәкдир.
Разылашын, һәҹҹ зијарәтини милјонерләр, олигархлар, мәшһурлар дејил, гаршысына «АЛЛАҺ наминә ҺӘҸҸ» мәгсәдини гојан вә буна наил олан ән ади инсанлар едир. Бу ҝүн биз сизә дүзҝүн гәнаәт етмәји өјрәдәҹәк вә тамамилә лазымсыз шејләрә нә гәдәр пул хәрҹләдијимизи данышаҹағыг.
Јемәк
Аиләнизин ајда јемәјә нә гәдәр хәрҹләдијини нә вахтса һесабламысынызмы? Илк бахышдан бу хәрҹләр әһәмијјәтсиз ҝөрүнүр, һәр ҝүн десертләрлә әјләнмәк, кафедә наһар етмәк, евә суши вә питса сифариш етмәк биздә ади гајдадыр. Бир аз гурумуш чөрәји атмаг, һәр ҝүн јени вә јени хөрәкләр биширмәк дә һәмчинин олдугҹа нормал һесаб олунур, һалбуки сојудуҹу ахшамдан јејилмәмиш јемәкләрлә долудур. Хејр, биз сизи аҹ галмаға чағырмырыг, һалбуки мүәјјән бир мүддәт әрзиндә јемәкдән тамамилә имтина етмәкдә дә әксәр инсанлар үчүн фајдадан башга бир шеј јохдур. Анҹаг бу ҝүн биз һәр шејдә расионал јанашмаја чағырырыг.
Ај әрзиндә кафејә баш чәкмәкдән тамамилә имтина етмәјә чалышын вә һәр дәфә ајагларыныз сизи гәһвә ичмәк үчүн раһат масанын јанына апаранда ирадәнизи јумруғунуза ҝөтүрүн вә јемәкләрә хәрҹләмәк истәдијиниз пулу ҝизли “ҺӘҸҸ” адлы пул гутусуна ҝөндәрин.
Јемәкханада һеч бир гәлјаналты евдә һазырланмыш јемәји әвәз едә билмәдији үчүн дадлы, евдә һазырланан наһар габыны ишә ҝөтүрмәјә вәрдиш един. Бүтүн аиләликлә бир ај әрзиндә менју үзәриндә дүшүнүн, лазым олан һәр шејин сијаһысыны тәртиб един, һардаса һипермаркетдә вә ја топдансатыш базарында бир јердә әрзаг алын вә 30 ҝүнлүјә мағазаларын олдуғуну унудун.
Ушаглары тәркибиндә Менделејевин бүтүн ҹәдвәли олан битки јағы вә конфетләрлә долдурулмуш печенјеләрлә дејил, евдә һазырлананларла, мөвсүми мејвәләрлә әзизләјин. Беләликлә сиз бир дашла ики гушу јыхаҹагсыныз - сағламлығы горумаг вә әсас һәдәфимиз үчүн әһәмијјәтли мәбләғә гәнаәт етмәк.
Палтар, косметика, ев хырдалыглары
Ијирминҹи өрпәк – “амма мән бу јумшаг-шафталы рәнҝин јанындан кечә билмәдим”; мүәллим маашынын јарысы гијмәтинә блуза – “лакин, мәним ушагларым һәр шејин ән јахшысыны ҝејмәлидирләр”; садәҹә олараг һәддән артыг долмуш шифонјерә сығмајан чанта – “мәҝәр мән өзүмә белә хырда бир шеји рәва ҝөрә билмәрәмми”.
Бәли, гадынлар - тиҹарәтин тәканвериҹи гүввәсидир. Мағазаларда ҹазибәдар сатышлар, һәр ҹүр аксијалар, јаланчы фајдалы тәклифләр бәшәријјәтин ҝөзәл јарысы үчүн нәзәрдә тутулмушдур. Нәтиҹәдә шкафларымыз илләрлә ҝејилмәјән әшјаларла долудур, евин бүтүн үфүги сәтһләриндә исә һәр ҹүр банкалар, түбикләр, бошгаблар, газанлар, финҹанлар, јастыглар, јорғанлар гојулуб.
Әҝәр сиз һәҹҹ зијарәтинә ҝетмәк арзунузу һәјата кечирмәк истәјирсинизсә, онда сиз садәҹә олараг минималист олмалысыныз. Фикирләшин ки, бизи әһатә едән һәр шеј, һәр бир әшја, һәр бир хырда шеј мүәјјән мигдарда пула баша ҝәлир. Бу анда бу чај дәстинә, кәсмә тахтасына, јени пәрдәләрә, әл креминә нә гәдәр еһтијаҹыныз олдуғуну дүшүнүн ја да бүтүн бунлар рәфләриниздә нөвбәти өлү јүк олаҹагдыр. Гардеробунузу јениләмәздән әввәл, артыг саһиб олдуғунуз палтарлары јохлајын вә өзүнүзә виҹданла ҹаваб верин: мәҝәр ҝејинмәјә бир шејиниз јохдур?
Әјләнҹә, истираһәт
Тезликлә һәҹҹ зијарәти етмәји һәдәфләдијиниз тәгдирдә имтина етмәли олдуғунуз башга бир хәрҹ маддәси, - әјләнҹәдир. Әҝәр биз һәр һәфтә сону киноја, әјләнҹә клубларына, аттраксион паркларына ҝетмәјә хејли мигдарда пул хәрҹләјириксә, һәҹҹә пулумуз олмадығыны демәк ахмаглыгдыр.
Әлбәттә, аилә истираһәтинә, өвладларымызы севиндирмәјә пул хәрҹләмәк истәјирик, амма биз сизи бундан тамамилә имтина етмәјә чағырмырыг. Истираһәт ҝүнләрини әјләнҹә клубунда кечирмәк әвәзинә ушагларла тәбиәтә ҝетмәк, топ ојнамаг, одда чај гајнатмаг, көмүр үзәриндә картоф биширмәк неҹә. Сизҹә, онлар бу ҹүр әјләнҹәләрдән даһа аз зөвг алаҹаглармы?
Гејд едилә билинмәјән даһа бир маддә, - бајрамлардыр. Аниматорлар, баһалы һәдијјәләр олан ад ҝүнләри, сәнәт әсәринә бәнзәр тортлар, һәтта һеч кимин јемәдији гәшәнҝ бајрам јемәкләри олан столлар. Нијә белә бајрамлар тәшкил едирик? Инстаҝрам сәһифәнизи ҝөзәл шәкилләрлә бәзәмәк үчүн, гоһумлар арасында ән сәхавәтли вә сәмими аилә нүфузу газанмаг үчүнмү? Анҹаг һәр дәфә бу ҹүр дүшүнүлмәмиш бир шәкилдә пул хәрҹләјәркән биз Мәккәдән, Мәдинәдән, бүтүн ҝүнаһларымыз үчүн бағышланма алмаг фүрсәтиндән узаглашырыг.
Глобал алыш-вериш
Һәҹҹ зијарәтинә путјовка дәјәринин јарысы кими баша ҝәлән телевизор, ејни мәбләғә мәтбәх вә ја јатаг отағынын мебели. Биз баһалы техника вә мебел үчүн пулумузу тәмәннасыз веририк, анҹаг Мәккәјә путјовканын дәјәри һәтта бир нечә мин рубла галхса, чох наразылығымызы билдиририк.
Әҝәр сиз һәгигәтән јахын ҝәләҹәкдә һәҹҹә ҝетмәк истәјирсинизсә, онда гонаг отағына јени бир диван алмагдан вә ванна отағыны тәмир етмәкдән имтина етмәлисиниз. Буна һазыр олун вә өзүнүзлә дүрүст олун.
Һәҹҹ пул гутунузу долдурмаг үчүн Ајфонунузу сата биләрсинизми? Иһрам ҝејмәк имканы үчүн бүдҹә автомобилинә кечиб отурмаға һазырсынызмы? Әҝәр бу суалларын ҹавабы бәли оларса, әмин олун ки, Уҹа Аллаһ сизә көмәк едәр вә мүгәддәс торпагдан гајытдыгдан сонра бу дүнјанын даһа чох јахшылығыны (немәтләрини) әлдә едәрсиниз.
Үрәјиниздә шүбһәләр варса, онда тәҹили олараг өз үзәриниздә ишә башламалысыныз. Јадда сахлајын, һәҹҹ илк фүрсәт дүшән кими јеринә јетирмәли олдуғумуз вәзифәмиздир вә олмадығы јердә бәһанә ахтармајын.
