Тәк әлдән сәс чыхмаз
Һәр һәфтә сону ҝәнҹ футболчулар командасы нөвбәти мәшгләрә топлашырды. Орада он вә он бир јашлы оғланлар ојнајырды.
Адәтән ушаглар меһрибан ојнајырдылар, амма бу дәфә нәсә ојуну корлады. Мәшгчи нә олдуғуну баша дүшә билмирди. О, фасилә елан етди. Бәлкә дә онлар јорулмуш ја да һәлә исинмәмишдиләр, дүшүнүрдү мәшгчи. Сонра јенә ушаглары ојнамаға бурахды. Анҹаг бу дәфә дә ојун уғурлу алынмады.
- Бу ҝүн сизә нә олуб? - мәшгчи ојуну дајандырыб ојунчулардан сорушду. - Сиз тамамилә меһрибан дејилсиниз. Илк дәфә ҝөрүрәм ки, топу бир-биринизә көнүлсүз өтүрүрсүнүз. Үстәлик, һәр бириниз јорғаны өз тәрәфинизә чәкмәјә чалышырсыныз, буна ҝөрә һамы әзијјәт чәкир. Команданызда нә баш вериб?
- Мәшгчи, оғланларымыздан икиси бир бири илә мүбаһисә едиб, - оғланлардан бири изаһ етди. - Инди командамыз да ики һиссәјә бөлүнүб.
- Проблеми бөлүшмәк истәјирсиниз? - мәшгчи сорушду.
Анҹаг һамы сәссизҹә башларыны ашағы салды. Мәшгчи онлара нәсә изаһ етмәли олдуғуну баша дүшдү.
- Билирсиниз, мән сизә белә дејәҹәјәм. Футбол - команда ојунудур. Бурада һәр кәс өзү үчүн дејил, һамы үчүндүр. Инсанын һәмишә проблем вә һәјәҹанлары олур, анҹаг өзүнү сындырмаға онлара иҹазә вермәк олмаз. Јәгин ки, чубуглар һаггында һекајәни ешитмисиниз: бирини гырмаг бөјүк бир гуҹаг чубуғу гырмагдан даһа асандыр, дәрһал чохлу чубуғу сындырмаг үчүн чох сәј ҝөстәрмәк лазымдыр. Сиз командасыныз вә нә олурса олсун ојнамалысыныз. Достлар арасында анлашылмазлыг варса, һәмишә данышмаг имканы вар. Проблеми сәрбәст һәлл едә билмирсиниз? Онда һәмишә көмәк етмәкдән мәмнун олан валидејнләриниз вә ја мәшгчиниз вар.
Ушаглар бир-бирләринә бахдылар. Сојунма отағында сакитлик олду.
- Мән сәндән үзр истәјирәм, - оғланлардан бири диҝәринә деди. – Биз сәнинлә мүбаһисә етдик вә сонда сөјүшдүк. Амма мән истәмирәм ки, бундан өтрү достлуғумуз битсин, һәм дә бүтүн команда әзијјәт чәксин.
- Мән дә ҝүнаһкарам. Мәни дә бағышла. Сүлһ?
- Сүлһ.
Ушаглар бир-биринин әлини сыхыб ҝүлүмсәдиләр.
- Бах, бу, башга сөһбәтдир, - мәшгчи разылыгла гејд етди. - Командада бири хәстәләнәндә һамы әзијјәт чәкир. Буна ҝөрә јахшы мүнасибәтләринизи горујун, мүбаһисә етмәјин, ҝүзәштә ҝедин вә достлугдан мөһкәм јапышын. Инди исә мән сиздән әла ојун ҝөзләјирәм. Ирәли!
Ушагларын әһвал-руһијјәси галхды, һамы ҝүлүмсәјиб мејданчаја чыхды. Бу ојун һеч-һечә баша чатды. Анҹаг һеч ким әсәбиләшмәди, чүнки команда даһа ҝүҹлү вә меһрибан олду. Белә бир аталар сөзү вар: “Ҝүҹлү достлуғу балта илә дә кәсмәк олмаз”.
