Qadın hiylələri – xeyirə, yoxsa zərərə?
Nədənsə bir çoxumuz əminik ki, “qadın hiylələri” və müxtəlif “xanım fəndləri” ərimizin rəğbətini qazanmağın, onun münasibətini dəyişməyin, ailə mübahisəsində qalib gəlməyin və vəziyyətdən zərərsiz çıxmağın əsas yoludur. Dodaqları büzmək, susmaq oyunu oynamaq və ya əvvəlcədən hazırlanmış, iti ox kimi düz ürəyə tuşlanan sözlər – gəlin birlikdə düşünək: qadın manipulyasiyaları ərlərimizə necə təsir edir?
Qadın hiyləsi №1 – “Günahsız günahkar”
Bəlkə də ən geniş yayılmış qadın fəndlərindən biri evdə elə bir “tamaşa” qurmaqdır ki, əsas məqsəd ərini maksimum dərəcədə yazıqlaşdırmaq olsun. Biz ağlayırıq, hönkürürük, ona “Bax, mənə necə pisdir!” kimi sözlər deyirik və əsl mini-tragediya səhnələşdiririk.
Bəli, ola bilər ki, birgə həyatın ilk aylarında bu cür “tamaşa” həyat yoldaşımıza təsir etsin. Amma çox keçmədən səbəbsiz göz yaşları artıq onu yalnız qıcıqlandıracaq.
Ən acınacaqlısı isə odur ki, bir gün doğrudan da kədərləndiyimiz zaman, ərimiz bunu növbəti hiyləgər cəhdimiz kimi qəbul edə bilər və bizə inanmaz.
Qadın hiyləsi №2 – “Borcdan çıxmır”, “Həqiqi kişi MÜTLƏQ…”, “Əgər məni həqiqətən sevirsənsə, onda SƏN BORCLUSAN...”
Bəli, biz – bir az hiyləgər qadınlar – reallığı elə təqdim etmək kimi xüsusi bir “incəsənətə” malikik ki, guya ərimiz daim borclu vəziyyətdə qalır. Bu zaman isə öz öhdəliklərimizi zərif şəkildə görməzdən gəlir və diqqəti onun ən xırda nöqsanlarına yönəldirik.
Şübhəsiz, hər bir kişi evlənməzdən əvvəl İslamda ailənin nə demək olduğunu aydın şəkildə dərk etməlidir. Amma unutmayaq ki, heç birimiz qüsursuz deyilik.
Ona görə də gəlin, sevdiyimiz insanı hansısa öhdəlikləri yerinə yetirmədiyinə görə qınamaq əvəzinə, ona ən yaxşı ər olmağa kömək edək. Necə? Sadəcə onun üçün ən yaxşı həyat yoldaşı olaq.
Qadın hiyləsi №3 – “Qonşunun əri ona brilyant boyunbağı hədiyyə edib…”, “Bax, sənin əmioğlun arvadı üçün necə saray tikib…”, “Bütün rəfiqələrimin artıq on altınci iPhone-u var, mən isə hələ də on beşincidən istifadə edirəm…”
Qadın hansısa bir arzuyla alışıb-yananda, onun hiyləsi sanki qlobal miqyasda işləməyə başlayır. Adətən, bir dəfə “yox” cavabı aldıqdan sonra biz artıq ərimizdən nəyisə birbaşa istəmirik, dolayısı yollar seçirik. Bununla yanaşı, incə, amma hiss olunan şəkildə kişinin özünəinamına toxunmağı, onun ambisiyalarını qıcıqlandırmağı da unutmuruq.
Amma, xanımlar, unutmayaq ki, biz də ambisiyalardan məhrum deyilik. Kişilərin isə bizi “yerimizə oturtmaq” üçün çox sadə bir yolu var – yenidən evlənmək. O zaman müqayisə aparan siz yox, sizin həyat yoldaşınız olacaq.
Buna görə də gəlin, sahib olduqlarımıza şükür edənlərdən olaq.
Qadın hiyləsi №4 – “Mən balaca qızam”
Qadınlar arasında uzun illərdir belə bir mif dolaşır ki, guya kişilər qadın infantil davranışına vurğundurlar. Guya onlar şıltaq, uşaq kimi hərəkətlər edən qadınlardan xüsusi zövq alırlar.
Və ərimiz üçün o arzulanan qadın olmaq naminə biz – tam yetkin və ağıllı qadınlar – üzərimizə “nazlı-şıltaq qız” maskası taxırıq. Məhz bu nöqtədə qadın hiyləsi artıq yüz faiz axmaqlığa çevrilir.
Heç kim demir ki, qadın daim ciddi və soyuqqanlı olmalıdır. Sadəcə bir şeyi qarışdırmayın: gəncliyin canlı enerjisini – hansı ki, onu mümkün qədər uzun müddət qorumaq lazımdır – uşaq hərəkətləri ilə. O hərəkətləri isə biz artıq çoxdan “şahzadə pijaması” ilə birlikdə uşaq otağımızda qoyub gəlməli idik.
Qadın hiyləsi №5 – “Kim daha yaxşı tərifləyər”
Bəlkə də bu, qadın hiylələri arasında elə birisidir ki, ər-arvad münasibətlərinə zərər vermir. Kişilər tərifi sevirlər və onları tərifləmək lazımdır – amma yerində, ölçülü və düzgün şəkildə.
Unutmayın: sevdiyimiz insana titrək sevgi ilə söylədiyimiz sözlər, onun məhz sizin əriniz olduğu üçün Uca Allaha olan sonsuz şükranlığınızı ifadə edən səmimi təriflər, ailə bağlarını daha da möhkəmləndirir və həyat yoldaşının qəlbini isidir.
Amma bunların kobud və saxta yaltaqlıqla heç bir əlaqəsi yoxdur. Belə davranışı isə birdəfəlik unutmaq lazımdır.
Nəticə: hiylə az, hikmət isə daha çox olsun. Qadına ən çox çatışmayan şey – dərin hikmətdir. Əgər biz hikmətli olmağı öyrənsək, hiyləyə artıq ehtiyac qalmaz.
