Ахы, нијә јадлашырыг?

Ај инсанлар, бу ишдир,

Ахы, нијә јадлашырыг?

Нә дөврандыр, нә ҝәрдишдир,

Ахы, нијә јадлашырыг?

Бир Адәмдән, бир Һәввадан

Төрәнмишик биз бир заман.

Јахшы дөнүб олур јаман –

Ахы, нијә јадлашырыг?

Гыш кимијик ҝөзәл јазда,

Ҝөрүшүрүк тојда, јасда.

Јаваш-јаваш, аста-аста

Ахы, нијә јадлашырыг?

Нәҹабәтдән дәм вуруруг,

Дост гәлбинә гәм вуруруг,

Ҝүлән ҝөзә нәм вуруруг –

Ахы, нијә јадлашырыг?

Гој ешитсин әҹдадымыз:

Унудулур сојадымыз,

Ҝөјә чыхыр фәрјадымыз –

Ахы, нијә јадлашырыг?

Тәһмираз ИМАМОВ