Тәсадүфиликләр тәсадүфи дејил
Вахтыныз хејир олсун, әзиз достлар! Сизин Хәдиҹә, һәмишә олдуғу кими, хош вә идрак сөһбәтинә көкләнмишдир. Бу ҝүн мән сизә гадын охуҹуларымыздан биринин башын ҝәлмиш һадисәни данышаҹағам. Ола билсин ки, сиз онун һекајәтиндән ибрәт дәрси кими өзүнүзә нәтиҹә чыхарарсыныз.
Бу, гыш сәһәри баш вермишди. Мән мәктәбә ҝеҹикирдим, буна ҝөрә дә чох тәләсирдим. Мәндән габагда күчә илә гыз ҝедирди. О да һарајаса чох тәләсирди. Бирдән она зәнҝ ҝәлди. Вә о, телефону чыхарараг, чантасыны јерә салды. Онун ичиндән төкүләнләри тез јығыб јолу илә јүјүрдү. Мәнсә онун чантасы әлиндән дүшән јерә чатанда бир аз узагда јердә кичик боз рәнҝли әшја ҝөрдүм. Бу, пул кисәси иди. Ону ҝөтүрүб ачанда ичиндә пул вә һансыса карточкалар ҝөрдүм. Пул кисәсини гајтармаг үчүн мән гызы ахтармаға башладым, о исә артыг ҝөрүнмүрдү.
Мән саата бахдым – зәнҝә ики-үч дәгигә галмышды. Әҝәр бу саат дәрсә ҝетсәм, онда мә’лум дејил, сонра пул кисәсинин саһибини тапа биләрәмми. Әҝәр ону ахтармаға ҝетсәм, онда дәрсә ҝеҹикәрәм вә мәни ҹәзаландыра биләрләр. Бир нечә санијә фикирләшәндән сонра мән гызы ахтармаға гачдым. Јахында дајанаҹаг јох иди, демәли о, миниб ҝедә билмәзди. Интуисија илә мән дөнҝәләрә дөнүр вә јолу кечирдим. Вә бирдән, мағазанын јанындан кечәркән, онун гапысында бу гызла тоггушдум. Онун бахышы чашгын вә кәдәрли иди, мәндә исә – үзүмдә севинҹ вә әлимдә пул кисәси. Мәни пул кисәси илә ҝөрүб о, бир аз тәәҹҹүбләнди. Анҹаг мән она һәр шеји изаһ етдим, иткини гајтардым вә мәктәбә гачдым. Јолда фикирләширдим ки, ҝеҹикмәјимин сәбәбини мүәллимәјә неҹә баша салым ки, инансын. Хошбәхтликдән о, мәни данламады. Садәҹә олараг хаһиш етди ки, даһа ҝеҹикмәјим. Вә һәтта деди ки, мән дүзҝүн һәрәкәт етмишәм. Вә елә бил бунунла мәним әһвалатым тамамланыр – о ҝүн мән белә фикирләширдим. Амма билирсиниз, бу әһвалатын гыса, лакин чох мараглы давамы вар.
Ертәси ҝүн тәнәффүс вахты мүәллимә мәнә јахынлашды. О деди ки, пул кисәсини гајтардығым гыз - онун гызыдыр. Биз икимиз дә белә тәсадүфә тәәҹҹүбләндик. Мүәллимә мәнә бир даһа миннәтдарлыг билдирди.
Һәјатда һәр шеј тәсадүфи дејилдир, вә һәмин ҝүн мән әбәс јерә мәктәбә ҝеҹикмәмишәм. Вә мән чох шадам ки, дүзҝүн һәрәкәт етмишәм.
Һә, әһвалат доғрудан да чох мараглыдыр, башлыҹасы исә одур ки, охуҹумуз дүзҝүн һәрәкәт етмишдир. Бәс сиз, ушаглар, неҹә һәрәкәт едәрдиниз?
Јери ҝәлмишкән, әҝәр сиздә дә һәјатыныздан вә ја достларынызын һәјатындан мараглы әһвалатлар варса, онлары почтумуза ҝөндәрин.
